Բարերում ու ռեստորաններում շուտով ծխել չեք կարողանա. գործադիրը հաստատեց որոշումը. ՏԵՍԱՆՅՈւԹ

Մարտի 15-ից հանրային սննդի փակ և բաց կետերում ծխելը կարգելվի․ կարգելվի նաև ծխախոտի փոխարինիչների ցուցադրությունն ու գովազդը․ գործադիրն այսօրվա նիստում հաստատեց Ծխախոտային արտադրատեսակների փոխարինիչների անվտանգության տեխնիկական կանոնակարգը: Էկոնոմիկայի նախարար Վահանն Քերոբյանն է ասում՝ օրենքը հնարավորություն կտա մարդկանց տեսադաշտն ազատել ծխախոտային արտադրատեսակներից․

«Հաշվի առնելով, որ ծխախոտի փոխարինիչների ինդուստրիան շատ նորարական է, անընդհատ ավելանում են արտադրատեսակները՝ մեր խնդիրն է արագ արձագանքել և նոր արտադրատեսակների վրա ևս տարածել տեխնիկիական կանոնակարգերը: Այս առաջարկով մենք սահմանափակում ենք ծխախոտային արտադրատեսակների փոխարինիչների ցուցադրումը, շրջանառությունը, օգտագործումը»,- ասաց Էկոնոմիկայի նախարար Վահան Քերոբյանը։

Ռեստորանի տնօրեն Սուրեն Աբգարյանը կողմ է օրենքին, եթե դա վերաբերեր  սննդի օբյեկտների միայն փակ տարածքներին․ բացօթյա հատվածում ծխելու  արգելքը վիճահարույց է համարում, հատկապես, երբ խոսքը վերաբերում է ծխախոտային փոխարինիչներին։  

«Բաց տարածքներում ծխելու արգելքի տրամաբանությունը չենք հասկանում»,- նշում է ռեստորանի տնօրենը։

Էկոնոմիկայի նախարար Վահան Քերոբյանն էլ սուրճի հետ ծխախոտ օգտագործող  քաղաքացիներին առաջարկում է սուրճը  գնել սրճարանից և դրսում խմել։ Նախարարը պարզաբանում է՝ սահմանափակման շարժառիթն այն է, որ ծխողներն սկսեն քիչ ծխել։ 

Ռեստորանի տնօրենը վստահ է՝ օրենքի կիրարկումից հետո ռեստորանային բիզնեսը կտուժի։

Էկոնոմիկայի նախարար Վահան Քերոբյանը բացատրում է՝ հատկապես հանրային սննդի վայրերում ծխելը զբոսաշրջիկները բացասական են ընկալում։ Ասում է՝ ինքն էլ 4 տարի առաջ օրվա ընթացքում 3 տուփ ծխախոտ էր օգտագործում իսկ այլ երկրներում ծխելու սահմանափակումը ստիպում էր քիչ ծխել։ 

Հիշեցնենք՝ 2022 թվականի հունվարից խանութներում է արգելված  ծխախոտի ցուցադրությունն ու գովազդը։

Մանրամասները՝ Factor.am-ի տեսանյութում։

Արփի Հակոբյան