14.09.2026 | 22:01
Հայաստանի մի շարք հասցեներում էլեկտրաէներգիայի անջատումներ կլինեն
Գողության ու կաշառքի դեպքերն ավելացել են․ 2021-ին արձանագրված իրավախախտումները՝ թվերով
10.02.2022 | 18:38
2021 թվականին Հայաստանում աճել է հանցագործությունների թիվը։ Այսպես․ նախորդ տարվա ընթացքում ՀՀ-ում գրանցվել է իրավախախտումների 30 հազար 245 դեպք՝ նախորդ տարվա 26 հազար 468-ի փոխարեն, այսինքն՝ գրանցված իրավախախտումների թիվն ավելացել է 3777-ով կամ 14,2 %-ով։ Այս մասին Factor.am-ը տեղեկանում է Վիճակագրական կոմիտեի հրապարակած տվյալների վերլուծությունից։
Ոչ մեծ ծանրության իրավախախտումների թիվն աճել է 2891-ով կամ 21 %-ով, միջին ծանրության իրավախախտումներինը՝ 587-ով կամ 7 %-ով, ծանր իրավախախտումներինը՝ 245-ով կամ 5․8 %-ով, իսկ առանձնապես ծանր հանցագործությունների թիվն ավելացել է 54-ով կամ շուրջ 18 %-ով։
Առավելապես աճել է գրանցված գողության, կաշառքի, թմրամիջոցների հետ կապված հանցագործությունների թիվը։
Սպանության դեպքերն ավելացել են 10-ով, սեռական անձեռնմխելիության և սեռական ազատության դեմ ուղղված հանցագործությունները՝ 12-ով, հրազենի ապօրինի շրջանառության դեպքերը՝ 67-ով, թմրամիջոցների հետ կապված հանցագործությունները՝ 318-ով, պետական կամ հանրային գույքի հափշտակությունները՝ 35-ով, անձնական գույքի հափշտակությունները՝ 1716-ով, գողություններ՝ 1616-ով։
Շուրջ 32 %-ով ավելացել են պետական իշխանության, ծառայության և կառավարման կարգի դեմ ուղղված հանցագործությունները։ Ըստ Ոստիկանության տվյալների՝ 2021-ին տեղի է ունեցել պետական, քաղաքական կամ հասարակական գործչի սպանության 1 դեպք։ Ոստիկանությունից Factor.am-ին տեղեկացրին, որ խոսքը 2021-ի նոյեմբերի 11-ին տեղի ունեցած դեպքի մասին է, որի ժամանակ սպանվել են ՀՀԿ-ական նախկին պատգամավոր Արտուշ Սիմոնյանը, Քանաքեռցի Տույ մականվամբ հայտնի քրեական հեղինակություն Արթուր Ղազարյանը և ևս 2 անձ։
Կաշառքի արձանագրված դեպքերն ավելացել են ավելի քան 50 %-ով, կեղծ փողեր պատրաստելու ու շրջանառելու դեպքեր՝ 119-ով, 83-ով նվազել են կոռուպցիոն բնույթի հանցագործությունները։
Աճել են նաև ճանապարհային երթևեկության և տրանսպորտային միջոցների շահագործման կանոնների խախտման դեպքերը։ Եթե 2020 թվականին նմանատիպ 1360 իրավախախտում է գրանցվել, 2021-ին՝ 1548։ 39-ը եղել է մահվան ելքով, ինչը 10-ով ավելին է 2020 թվականի մահվան ելքով ՃՏՊ-ներից։
Անժելա Պողոսյան
