18.08.2026 | 16:56
Դնեպրոպետրովսկի մարզի 16 բնակավայրերից երեխաներով ընտանիքները հարկադիր տարհանվում են
Ալեն Սիմոնյանի 3,5 միլիոնանոց այցը ԱՄՆ․ պաշտոնյան մեկնաբանել է բիզնես դասով թռիչքը. ՏԵՍԱՆՅՈւԹ
Քաղաքականություն
09.02.2022 | 21:20
Նախօրենին Factor.am-ը գրել էր, որ Ազգային ժողովի նախագահ Ալեն Սիմոնյանն աշխատանքային այցի շրջանակներում ԱՄՆ մեկնել է բիզնես դասի ավիատոմսով: Սիմոնյանի ավիատոմսի համար պետբյուջեից վճարվել է 3 միլիոն 375 հազար դրամ: Եվս կես միլիոն դրամ փոխանցվել է Ալեն Սիմոնյանին գիշերակացի համար, իսկ օրապահիկի համար հատկացվել է շուրջ 250 հազար դրամ:
ՀՀ նախագահի ժամանակավոր պաշտոնակատար Ալեն Սիմոնյանը Parliament monitoring կայքին տված հարցազրույցի ընթացքում անդրադառնալով մեր հրապարակմանը, պարզաբանել է՝ 24 ժամ թռիչքից հետո ԱՄՆ-ում պետք է հանդիպումներ ունենար և չէր կարող դրանց ժամանակ քնել։
«Ներողություն եմ խնդրում, բայց ես չեմ համարում, որ երկրի ղեկավար կազմը աշխատանքային այց անելիս պետք է լինի 16 ժամ ինքնաթիռում չքնած ու դրանից հետո գնա բանակցի: Ես համարում եմ, որ դա ճիշտ է, և ուզում եմ ասել, որ բոլոր այն աշխատանքային կամ պաշտոնական այցերը, որտեղ թռիչքը երկար է լինելու, ունենալու են պայմաններ, որտեղ հնարավոր է լինելու աշխատել: Օրինակ, երբ Մոսկվա ես թռչում, դրա կարիքը չկա, որովհետև կարճ է թռիչքը:
ԱՄՆ մեր ուղևորությունը տևել է 24 ժամ, այսինքն, մենք 24 ժամ ճանապարհին ենք եղել: Այստեղից մեկ այլ երկիր ենք գնացել, այնտեղ սպասել ենք, հետո շարունակել ենք: Բայց ես ԱՄՆ-ում պետք է հանդիպումներ ունենայի և ես չէի կարող հանդիպումների ժամանակ քնել: Ինչ վերաբերում է գիշերակացին, այն որևէ ձևով չի տարբերվում հասարակ միջին գիշերակացից: Ընտրվել է միջին դասի հյուրանոց, որևէ արտառոց բան դրա մեջ չեմ տեսնում: Համարում եմ, որ ավելի լավ պայմաններ պետք է ստեղծվեն, որ այն մարդիկ, որոնք գնում են աշխատելու, հնարավորություն ունենան նաև հանգստանալու»:
Նշենք, որ ԱԺ նախագահի գլխավորած պատվիրակությունն ԱՄՆ-ում էր հունվարի 15-ից 20-ը: Ընդհանուր գործուղման համար պետական բյուջեից վճարվել է 13 մլն դրամ: Այս գումարը ներառում է նաև Ալեն Սիմոնյանի համար արված վերոնշյալ ծախսերը: Պատվիրակության մյուս անդամները Երևանից Վաշինգտոն մեկնել են էկոնոմ դասի ավիատոմսերով, որոնցից յուրաքանչյուրի արժեքը 735 հազար դրամ է եղել, իսկ գիշերակացի համար յուրաքանչյուրին հատկացվել է 438 հազար դրամ, օրապահիկի համար՝ 250 հազար, ևս 80 հազար դրամ հատկացվել է ներկայացուցչական ծախսերին: ԱԺ պատվիրակության անդամները ԱՄՆ-ում հյուրընկալվել են Վաշինգտոնի «Churchill 4» էկոնոմ դասի հյուրանոցում:
Խնդրի առնչությամբ մեկնաբանություն խնդրեցինք «Հետք» էլեկտրոնային թերթի լրագրող Վահե Սարուխանյանից, որը պարբերաբար հետաքննություններ է իրականացնում պաշտոնյաների ավիաթռիչքների հետ կապված։
Մանրամասները՝ տեսանյութում։
Ռոզա Վարդանյան
