Ռուբեն Հայրապետյանի փաստաբանի պնդմամբ՝ իր պաշտպանյալի նկատմամբ հետապնդումը քաղաքական բնույթ է կրում

Այսօր ասուլիս էր հրավիրել Հայաստանի ֆուտբոլի ֆեդերացիայի նախկին նախագահ, գործարար Ռուբեն Հայրապետյանի պաշտպան Ամրամ Մակինյանը։ Նա տեղեկացրեց, որ երեկ պաշտոնապես իրենց է փոխանցվել Քննչական կոմիտեի փորձագետի եզրակացությունը։ Ըստ Մակինյանի՝ «Ռուբեն Հայրապետյանի և մյուսների նկատմամբ երկու տարվա գործողությունները բացարձակապես անօրինական են»։
Հիշեցնենք՝ 2019 թվականին ոստիկանությունը հետապնդում սկսեց ՀՖՖ նախկին նախագահ Ռուբեն Հայրապետյանի նկատմամբ, խուզարկություններ կատարվեցին գործարարի տանը, նրան պատկանող «Հարսնաքար» ռեստորանային համալիրում, կահույքի արտադրամասում և ևս երեք անձանց բնակարաններում։ Հայրապետյանը մեղադրվում է չարաշահումների կազմակերպման և 562 մլն դրամի յուրացման մեջ։

Գործը հարուցվել է 2019 թվականի դեկտեմբերի 12-ին ոստիկանության Կազմակերպված հանցավորության դեմ պայքարի գլխավոր վարչության նախաձեռնությամբ։ Ավելի քան երկու տարի քրեական հետապնդում է իրականացվում: Մակինյանը պարզաբանեց՝ թեև գործը հարուցվել է ՀՖՖ նախկին նախագահի մեքենայությունների փաստով, սակայն անձամբ Հայրապետյանին մեղադրանքը ձևակերպված չէ:

«Նախաքննության ընթացքում պարզվել է, որ Հայրապետյանը ոչ միայն չի յուրացրել գումարը, այլև դեռ իրեն են պարտք։ Փորձագետներն արձանագրել են, որ այս պահին ՀՖՖ-ն Հայրապետյանին պատկանող ընկերությանը պետք է ևս 84 մլն 325 հազար դրամ վճարի: Սա Հայրապետյանի նկատմամբ առաջին գործն է։ Նույն ճակատագրին կարժանանան մյուս գործերը։ Սպասում ենք նաև ոստիկանության արձագանքին նշվածի, ինչպես նաև Ռուբեն Հայրապետյանի բարի համբավի վերականգնման վերաբերյալ»,- ասաց փաստաբանը՝ պնդելով, որ Հայրապետյանին ապօրինաբար թույլ չեն տվել հեռանալ երկրից և, որ նրա նկատմամբ հետապնդումը քաղաքական բնույթ է կրում։

Ռոզա Վարդանյան