17.10.2026 | 12:26
Փաշինյանի և Ժապարովի պաշտոնական այցի արդյունքներով համագործակցության փաստաթղթեր են ստորագրվել
Զգուշավոր լավատեսություն կա․ Զասը՝ հայ-ադրբեջանական հարաբերությունների մասին
Քաղաքականություն
09.02.2022 | 13:03
Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասը խոսել է Հայաստանի և Ադրբեջանի միջև Հարավային Կովկասում խաղաղության հաստատման հեռանկարների մասին։ Ելույթ ունենալով «Հավաքական անվտանգությունը նոր դարաշրջանում. ՀԱՊԿ-ի փորձն ու հեռանկարները» կոնֆերանսում՝ Վալդայ միջազգային քննարկման ակումբի շրջանակներում՝ Զասը հայտարարել է, որ կարգավորման վերաբերյալ որոշակի զգուշավոր լավատեսություն կա։
Նա նշել է, որ Հայաստանի, Ռուսաստանի և Ադրբեջանի ղեկավարների 2020 թվականի նոյեմբերի 9-ի եռակողմ հայտարարության ստորագրումից և ռուս խաղաղապահների Ղարաբաղ մուտքից հետո իրավիճակը կայունացել է, արյունահեղությունը դադարել։
«Իհարկե, լարվածության օջախներ կան, և դրանք հայ-ադրբեջանական սահմանին են, ես այնտեղ էի, իմ աչքով տեսա, թե ինչ է կատարվում այնտեղ, բայց իրականում սահման, որպես այդպիսին, չկա, կա շփման գիծ, հենակետեր, դիտակետեր։ Պարբերաբար փոխհրաձգություններ են լինում, այդպես չպետք է լինի»,- ասել է նա։
Գլխավոր քարտուղարի խոսքով, այժմ կողմերի առջև ծառացած է սահմանագծման և սահմանազատման լուրջ խնդիր, դա մեծ ու բարդ աշխատանք է, բայց, այնուամենայնիվ, զգալիորեն կամրապնդի տարածաշրջանի անվտանգությունը։
«Զգուշավոր լավատեսություն կա, որ պատերազմի մի ամբողջ դարաշրջան ավարտվում է, և մեկ այլ դարաշրջան է սկսվում: Ես կարող եմ սխալվել նման լավատեսության առումով, բայց, ամեն դեպքում, մենք պետք է ողջունենք այն քայլերը, որոնք այժմ արվում են խաղաղության հաստատման ուղղությամբ», – շեշտել է Զասը։
Տաթև Ֆռանգյան
