Հասարակություն
08.02.2022 | 15:03
Երեկ Հայաստան վերադարձած ռազմագերիներին առնչվող քրեական գործ չի հարուցվել։ Նրանցից 6-ը երեկ վերադարձել են իրենց ընտանիքներ, իսկ 2 ժամկետային զինծառայողներ տեղափոխվել են ռազմական ոստիկանություն՝ նրանց հետագա ծառայության հետ կապված հարցը լուծելու համար․ այս մասին Factor․am-ին ասաց Քննչական կոմիտեի մամուլի քարտուղար Վարդան Թադևոսյանը։
Երեկ Factor․am-ը նաև տեղեկություններ էր ստացել այն մասին, որ հայրենադարձված գերիների հարազատները հարցաքննության ժամանակ աղմուկ են բարձրացրել, փորձել են կոտրել Քննչական կոմիտեի շենքի ապակիները: Վարդան Թադևոսյանը նշեց, որ նման բան չի եղել, պարզապես ծնողները հուզված են եղել, սակայն ոստիկանները նրանց հանդարտեցրել են։
Հիշեցնենք, որ փետրվարի 4-ին տեղի ունեցած հեռավար հանդիպման արդյունքներով՝ Ֆրանսիայի նախագահ Էմանուել Մակրոնի և Եվրոպական խորհրդի նախագահ Շառլ Միշելի միջնորդությամբ երեկ 8 հայ ռազմագերիներ էին վերադարձել հայրենիք։
Հեղինակ՝ Սաթենիկ Հայրապետյան
