18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Պուտինն ու Մակրոնը կարևորել են ԵԱՀԿ Մինսկի խմբի գործունեությունը
Քաղաքականություն
08.02.2022 | 12:03
Երեկ Կրեմլում կայացած շուրջ 6-ժամյա բանակցությունների ընթացքում Ռուսաստանի ու Ֆրանսիայի ղեկավարները անդրադարձել են նաև ԼՂ հակամարտության հարցին՝ կարևորելով ԵԱՀԿ Մինսկի խմբի համանախագահների գործունեությունը։ Այս մասին ասված է Կրեմլի պաշտոնական կայքէջում։
«Լեռնային Ղարաբաղի շուրջ ստեղծված իրավիճակը դիտարկելիս նշվել է ռուս խաղաղապահների դրական դերը, որոնք ապահովում են հրադադարի պահպանումը և նպաստում խաղաղ կյանքի հաստատմանը։ Մենք վերահաստատեցինք ԵԱՀԿ Մինսկի խմբի համանախագահների գործունեության կարևորությունը, այդ թվում՝ տարածաշրջանում հրատապ հումանիտար և սոցիալ-տնտեսական խնդիրների լուծման գործում։ Ֆրանսիայի նախագահը տեղեկացրել է Եվրոպական խորհրդի նախագահ պարոն Միշելի հետ Ադրբեջանի նախագահի և Հայաստանի վարչապետի հետ վերջերս կայացած տեսակոնֆերանսի արդյունքների մասին»,- ասել է Պուտինը Կրեմլում բանակցություններից հետո Մակրոնի հետ համատեղ մամուլի ասուլիսում։
Ֆրանսիայի նախագահը ևս իր հերթին անդրադարձել է ԼՂ հակամարտությանը՝ խոսելով 8 հայ ռազմագերիների վերադարձից։
«Մենք անդրադարձանք նաև մի շարք այլ հարցերի, մասնավորապես՝ Հայաստանի և Ադրբեջանի միջև հակամարտությանը։ Այստեղ ես ուզում եմ իմ ուրախությունը հայտնել, որ այսօր առավոտյան 8 բանտարկյալներ ազատ են արձակվել։ Ֆրանսիական ճգնաժամային կենտրոնը ինքնաթիռ է տրամադրել նրանց տեղափոխման համար։
Անցած ուրբաթ նախագահներ Ալիևի և Փաշինյանի հետ տեսակապի միջոցով բանակցություններ ենք վարել, որոնց ընթացքում բարձրացվեցին անհայտ կորածների, փախստականների և մի շարք այլ հարցեր, որոնք նույնպես կայունության բաղադրիչներ են»,- հայտարարել է Մակրոնը՝ նշելով, որ թե՛ ՌԴ-ն և թե՛ Ֆրանսիանն Մինսկի խմբի շրջանակներում կատարում են իրենց դերակատարությունը։
Տաթև Ֆռանգյան
