Առաջին փուլով նախագահ չի՞ ընտրվի․ ընդդիմությունը հրաժարվել է գործընթացին մասնակցելուց. ՏԵՍԱՆՅՈՒԹ

Ընդդիմությունը Հանրապետության նախագահի թեկնածու չի առաջադրի։ Այսօր Ազգային ժողովի «Հայաստան» և «Պատիվ ունեմ» խմբակցությունները համատեղ հայտարարությամբ հանդես եկան՝ հայտնելով այդ լուրը, բացի այդ նշում են՝ որոշել են որևէ կերպ չմասնակցել Հանրապետության նախագահի ընտրությանը: Ստացվում է, որ ընդդիմադիր խմբակցությունները չեն մասնակցելու նաև քվեարկությանը:

Արդյունքում՝ Ազգային ժողովում ընտրությունը լինելու է նախագահի 1 թեկնածուի շուրջ։ Սահմանադրության համաձայն՝ երկրի նախագահի ընտրության համար առաջին փուլում անհրաժեշտ է պատգամավորների ընդհանուր թվի ձայների առնվազն երեք քառորդը կամ 81 կողմ ձայն: Իսկ ԱԺ մեծամասնությունը 71 մանդատ ունի: Հետևաբար՝ առանց ընդդիմության 10 ձայնի, նախագահի թեկնածուն չի ընտրվի: Սա ենթադրում է, որ, ամենայն հավանականությամբ, նախագահ կընտրվի 2-րդ փուլով։ Այդ դեպքում նա ընտրվում է ձայների 3/5-ով, այսինքն՝ անհրաժեշտ է լինելու 64 ձայն, և ՔՊ-ի ձայները բավարար են լինելու։

Այսպիսով, իշխող ուժի նախագահի թեկնածու Վահագն Խաչատրյանը հնարավորություն ունի ընտրվելու միայն 2-րդ փուլով։
Հիշեցնենք․ Արմեն Սարգսյանը նախագահի պաշտոնում ընտրվել էր 2018 թվականի մարտի 2-ին։ 4 տարի աշխատելուց հետո նա հրաժարական ներկայացրեց այս տարվա հունվարի 23-ին: Դիմումը հետ վերցնելու համար Սարգսյանը մեկ շաբաթ ժամանակ ուներ, բայց քանի որ որոշումը չփոխեց, նրա լիազորությունները դադարեցվեցին։ Այս պահին նախագահի ժամանակավոր պաշտոնակատար է Ալեն Սիմոնյանը: Սահմանադրության համաձայն, նախագահի պաշտոնը թափուր մնալուց ոչ շուտ, քան 25, և ոչ ուշ, քան 35 օր հետո անցկացվում է արտահերթ ընտրություն:

Մանրամասները՝տեսանյութում։

Մերի Մարտիրոսյան