Կենդանաբանական այգում փորձել են թունավորե՞լ կենդանիներին․ ոստիկանություն հաղորդում է ներկայացվել. ՏԵՍԱՆՅՈՒԹ

«Միտում են ունեցել կազմակերպել հերթական կենդանու թունավորումը՝ նոր տնօրինությանը վարկաբեկելու և մեղադրելու համար»,- ֆեյսբուքյան իր էջում այս մասին գրել է Երևանի Կենդանաբանական այգու տնօրենի պաշտոնակատար Արևիկ Մկրտչյանը՝ տեղեկացնելով, որ այգու տարածքում կասկածելի տոպրակ են գտել։

«Այս պարկը գտել ենք Կենդանաբանական այգու սմբակավորների բաժնում՝ ուղտի և թուրքմենական կուլանների ազատավանդակում՝ ջրավազանի մոտ: Պարունակությունն ամբողջովին առնետի թույն էր. կենդանաբույժներս տեղում տարբերակեցին: Առնետի թույնը, հավանաբար, փորձել էին լցնել ջրավազանի մեջ, որից ջուր են խմում այգու միակ ուղտն ու երկու կուլանները: Աշխատակիցների աչալրջության շնորհիվ կարողացանք կանխել»,- գրել է նա։

Մկրտչյանի համոզմամբ՝ կենդանիներին թունավորելու պրակտիկան այգում գործում է դեռ խորհրդային տարիներից, և նման դեպքերն ի հայտ են գալիս նոր տնօրեն նշանակելու օրվանից։ Factor TV-ն կապ հաստատեց Մկրտչյանի հետ, սակայն վերջինս հորդորեց սահմանափակվել գրառմամբ, քանի որ այս պահին նյութեր են նախապատրաստվում։

Ոստիկանության հասարակայնության և լրատվության վարչությունից Factor TV-ին տեղեկացրին, որ այս մասին հաղորդումը ստացվել է հունվարի 24-ին ժամը 13։00-ին, ըստ որի՝ հունվարի 22-ի ժամը 16։30-ից մինչև հունվարի 23-ի ժամը 11։15-ն ընկած ժամանակահատվածում նշված այգում ուղտի և կուլանների ազատավանդակներում դրել են կարմիր գույնի կասկածելի հաբեր՝ փորձելով դիտավորությամբ թունավորել նշված կենդանիներին: Նշանակվել է փորձաքննություն:

Դեռևս նախորդ տարվանից Կենդանաբանական այգու մի խումբ աշխատակիցներ բողոքի ակցիաներ էին կազմակերպում տնօրենի ժամանակավոր պաշտոնակատար Արևիկ Մկրտչյանի նշանակման դեմ։ Իսկ օրեր առաջ այգու աշխատակիցները բողոքում էին, որ իրենք աշխատանքից հեռացման վտանգի առաջ են, քանի որ Կարմիր գրքում հայտնված 4 անգղ է անկել՝ 2 սպիտակագլուխ, 2՝ սև: Տնօրինությունը մեղադրում է իրենց, այնինչ աշխատակիցները պնդում են՝ թռչունները սատկել են սովից։

Մանրամասները՝ տեսանյութում։

Ռոզա Վարդանյան