Նախագահի թեկնածուների առաջադրման վերջնաժամկետը լրանում է կիրակի

ՀՀ նախագահի պաշտոնին հավակնող թեկնածուները պետք է առաջադրվեն մինչև շաբաթվա վերջ։ Այս կիրակի՝ փետրվարի 6-ին, լրանում է վերջնաժամկետը։ Առայժմ միայն իշխանությունն է նախագահի թեկնածու առաջադրել. «Քաղաքացիական պայմանագիր» խմբակցության թեկնածուն բարձր տեխնոլոգիական արդյունաբերության նախարար Վահագն Խաչատրյանն է։

Ընդդիմությունը ևս կարող է նախագահի թեկնածու առաջադրել 27 պատգամավորի ստորագրության առկայության դեպքում։ ԱԺ ընդդիմադիր 2 խմբակցությունները, սակայն, առայժմ քննարկումների մեջ են և վերջնական որոշում չունեն այդ հարցով։ Ընտրությունն, ամենայն հավանականությամբ, տեղի կունենա փետրվարի վերջին կամ մարտի սկզբին։ Հրաժարականի դեպքում նոր նախագահի ընտրության համար ԱԺ կանոնակարգով 25-ից 35-օրյա ժամկետ է սահմանված։ 1-ին փուլով ընտրվելու համար թեկնածուին առնվազն 81 պատգամավորի քվե է հարկավոր։ Իսկ քանի որ իշխանական խմբակցությունը 71 պատգամավոր ունի, ընդդիմության կարիքն էլ կունենա՝ իր առաջադրած թեկնածուի ընտրության համար։ Եթե դա չհաջողվի, տեղի կունենա 2-րդ փուլ, որի դեպքում իշխանական խմբակցությունը անհրաժեշտ ձայները միայնակ կարող է ապահովել։ ՀՀ Սահմանադրության 124-րդ հոդվածը սահմանում է, որ Հանրապետության նախագահ կարող է ընտրվել 40 տարին լրացած, վերջին 6 տարում միայն Հայաստանի Հանրապետության քաղաքացի հանդիսացող, վերջին 6 տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք:

Մերի Մարտիրոսյան