Ռուսաստանը սպառնում է ոչ միայն Ուկրաինային, այլև ժամանակակից միջազգային կարգին․ Բայդեն

ԱՄՆ նախագահ Ջո Բայդենը հայտարարությամբ է հանդես եկել ՄԱԿ-ի Անվտանգության խորհրդի նիստի վերաբերյալ, որը նվիրված է Ուկրաինայի շուրջ ստեղծված իրավիճակին։ Այս մասին հաղորդում է «Ամերիկայի ձայնի» ռուսական ծառայությունը։

«ՄԱԿ-ի Անվտանգության խորհրդում Միացյալ Նահանգները մանրամասնեց Ուկրաինայի ինքնիշխանությանն ու տարածքային ամբողջականությանը սպառնացող ռուսական սպառնալիքի բնույթը»,- ասել է Ջո Բայդենը։

Նա հավելել է, որ միջազգային հանրությանը բացատրել են այդ սպառնալիքի բոլոր հետևանքները՝ ոչ միայն Ուկրաինայի, այլ նաև ՄԱԿ-ի կանոնադրության և ժամանակակից միջազգային կարգի հիմնական սկզբունքների համար։

«Եթե Ռուսաստանն անկեղծորեն հավատարիմ է երկու կողմերի միջև առկա անվտանգության հարցերը երկխոսության միջոցով լուծելուն, ապա Միացյալ Նահանգները և մեր դաշնակիցներն ու գործընկերները կշարունակեն բարեխիղճ փոխգործակցությունը: Եթե դրա փոխարեն Ռուսաստանը որոշի հրաժարվել դիվանագիտությունից և հարձակվել Ուկրաինայի վրա, նա պատասխանատվության կենթարկվի և կբախվի արագ ու ծանր հետևանքների»,- զգուշացրել է ԱՄՆ նախագահը։

«Միացյալ Նահանգներն ու մեր գործընկերները ու դաշնակիցները շարունակում են պատրաստվել ցանկացած սցենարի։ Աշխարհը պետք է հստակ պատկերացում ունենա այն գործողությունների մասին, որոնցով սպառնում է Ռուսաստանը, և պատրաստ լինի արձագանքել այն ռիսկերին, որոնք վտանգ են ներկայացնում բոլորիս համար։ Անվտանգության խորհրդի նիստը կարևոր քայլ է աշխարհը համախմբելու միասնական դիրքորոշման շուրջ, այն է՝ դատապարտել ուժի կիրառումը, կոչ անել ռազմական ապաէսկալացիայի, աջակցել դիվանագիտությանը որպես առաջընթացի լավագույն ուղի և պահանջել, որ յուրաքանչյուր անդամ պետություն գործի պատասխանատու և ռազմական ագրեսիա չիրականացնել իրենց հարևանների նկատմամբ»,- ասել է Բայդենը։

Երկուշաբթի ավելի ուշ Սպիտակ տան ղեկավարն ասել է, որ հաշվի առնելով Ուկրաինայի հետ սահմանին ռուսական զորքերի շարունակական կուտակումը՝ ԱՄՆ-ը պատրաստ է ցանկացած սցենարի։

Բայդենը նաև ասել է, որ անցյալ շաբաթ արդյունավետ զրույց է ունեցել Ուկրաինայի նախագահ Վլադիմիր Զելենսկու հետ։ Նա նշել է լարվածությունը նվազեցնելու ուղղությամբ իր վարչակազմի շարունակական դիվանագիտական ջանքերը։

Տաթև Ֆռանգյան