01.11.2024 | 18:26
Թուրքիան ՌԴ-ից ներկրվող բնական գազի համար հատուկ գին է ցանկանում ստանալ
Ամասիայի համայնքապետը դիմել է ոստիկանություն․ Արփի համայնքի փաստաթղթերը հրաժարվում են հանձնել
Քաղաքականություն
01.02.2022 | 12:16
Ամասիա խոշորացված համայնքի նորընտիր ղեկավար Ջեմմա Հարությունյանը դիմել է ոստիկանություն, որպեսզի ապահովեն Արփի համայնքապետարանի փաստաթղթերի հանձնում-ընդունումը։ Այս մասին Factor.am-ի հետ զրույցում տեղեկացրեց Ջեմմա Հարությունյանը։
Բանն այն է, որ Արփի համայնքի գործող ղեկավար Մերգել Ղարիբյանը հրաժարվում է փաստաթղթղերը հանձնելուց։ Նա Ամասիա խոշորացված համայնքի ՏԻՄ ընտրություններին մասնակցում էր ՔՊ-ի ցուցակում, սակայն նրա գլխավորած քաղաքական ուժը ինքնաբացարկ հայտնեց, հրաժարվեց նաև 6 մանդատաներից։ Երեկ Մերգել Ղարիբյանի համակիրները բողոքի ակցիա էին անցկացնում Բերդաշեն համայնքում։ Մերգել Ղարիբյանը մեզ հետ զրույցում ասաց, որ չեն ընդունում ընտրությունների արդյունքները, դիմել են վարչական դատարան, դատարանը չի բավարարել իրենց հայցը, հետևաբար՝ բողոքարկելու են Վերաքննիչ դատարան։
«Բնակչությունը չի ուզում, որ իրենց համայնքի թղթաբանությունը հանձնվի Ջեմմա Հարությունյանին։ Բնակիչների պատճառաբանությունն այն է, որ մենք ամենաշատ ձայներն ենք հավաքել ՏԻՄ ընտրություններում։ 9 մանդատով չի կարող իշխանություն ձևավորվել»,-ասաց Մերգել Ղարիբյանը։
Հիշեցնենք, որ Ամասիա խոշորացված համայնքի ՏԻՄ ընտրություններին մասնակցում էին երեք քաղաքական ուժեր՝ ՀՀԿ-ն, որը ստացավ երեք մանդատ, «Արփի Ամասիա» նորաստեղծ դաշինքը, որը ստացավ վեց մանդատ և որի թեկնածուն՝ 71-ամյա Ջեմմա Հարությունյանն ընտրվեց համայնքապետ։
Իսկ ՔՊ-ն, որի ձայների քանակով առաջատար էր ու ստացել էր վեց մանդատ, ոչ միայն հրաժարվեց մանդատներից, այլ ավագանու 32 թեկնածուները ինքնաբացարկի դիմումներ ներկայացրեցին՝ պահանջելով նոր ընտրություններ։
ՔՊ-ականները գտնում են, որ ամենաշատ ձայները իրենք են ստացել, հետևաբար՝ համայնքապետի պաշտոնը պիտի զբաղեցնի իրենց թեկնածուն։
Արմիկ Մովսիսյան
