Ո՞ւմ է վերաբերում ինքնամեկուսացման ժամկետի կրճատումը․ կորոնավիրուսային սահմանափակումների մեղմացում․ ՏԵՍԱՆՅՈՒԹ

Հայաստանում մեղմացվում են կորոնավիրուսով պայմանավորված ինքնամեկուսացման սահմանափակումները։ Երկու դեղաչափով պատվաստված այն անձինք, որոնք վարակվել են կորոնավիրուսով, այսուհետ կինքնամեկուսացվեն ՊՇՌ հետազոտության նմուշառման օրվանից հաշված 7 օրացուցային օրով: Չպատվաստված անձանց համար ևս կրճատվել է ժամկետը․ նրանք պետք է մեկուսանան 10 օրով։

Մինչ այս փոփոխությունը՝ կորոնավիրուսով վարակված յուրաքանչյուր ոք պետք է ինքնամեկուսանար 14 օր ժամկետով՝ անկախ պատվաստված լինել-չլինելու հանգամանքից։

Նոր փոփոխությունը սահմանում է, որ ինքնամեկուսացման ժամանակահատվածում ՊՇՌ հետազոտության նմուշառման օրվանից հաշված 7-րդ օրը չպատվաստված անձինք, իրենց նախաձեռնությամբ, կարող են անցնել ՊՇՌ հետազոտություն և բացասական արդյունքի դեպքում դուրս գան ինքնամեկուսացումից: Հիշեցնենք՝ անձին ինքնամեկուսացման հրահանգ տրվում է կորոնավիրուսային հիվանդության հաստատման դեպքում, եթե վերջինս ենթակա չէ հոսպիտալացման:

Կառավարությունը որոշում է կայացրել փոփոխություն մտցնել նաև երկրից մուտքի-ելքի սահմանափակումներում։ Մասնավորապես, առաջարկվում է թույլատրել օդանավակայանում ժամանած անձանց դիմավորողների մուտքը ժամանման սրահ՝ խստորեն պահպանելով հակահամաճարակային կանոնները:

Նշենք, սակայն, որ Հայաստանում վերջին շաբաթվա ընթացքում 4-5 անգամ աճել է կորոնավիրուսով վարակվողների օրական թիվը։ Սկսվել է վարակի հինգերորդ ալիքը, որն ավելի արագ է տարածվում։ Հունվարի 28-ին գրանցվեց մեկ օրում հաստատված նոր դեպքերի՝ երբևէ գրանցված ամենաբարձր ցուցանիշը՝ 3536։ Վերջին մեկ շաբաթվա ընթացքում վարակը հաստատվել է 16 758 մարդու մոտ։

Ըստ մասնագետների՝ նոր ալիքի պատճառը «օմիկրոն» շտամն է, որն ավելի վարակիչ է, քան «դելտան», սակայն ավելի թեթև ընթացք է ունենում։

Մանրամասները՝ տեսանյութում։

Ռոզա Վարդանյան