Ով Տեր-Պետրոսյանի շրջապատից մի քայլ այն կողմ է գնացել, նրան դավաճանի պիտակ են կպցրել. անընդունելի է․ Աղազարյան․ ՏԵՍԱՆՅՈՒԹ

Այսօր տեղի է ունեցել «Քաղաքացիական պայմանագիր» խմբակցության փակ նիստ, որի ժամանակ քննարկվել է նաև ՀՀ նախագահի թեկնածուի հարցը:

Անդրադառնալով շրջանառվող տեղեկատվությանը, որ ՔՊ թեկնածուն ԲՏԱ նախարար Վահագն Խաչատուրյանն է, «Քաղաքացիական պայմանագիր» խմբակցության պատգամավոր Հովիկ Աղազարյանը նշեց. «Պետք է սպասենք մեկ շաբաթ ժամկետը լրանա և վերջնական տեղեկատվություն կլինի, թե ով է թեկնածուն»: Պատգամավորը հավելեց, որ դա ՔՊ վարչության որոշելիք հարցն է:

Անդրադառնալով հարցին, թե ՔՊ-ի համար ընդունել՞ է, որ Վահագն Խաչատուրյանը նախկինում Լևոն Տեր-Պետրոսյանի թիմակիցն է եղել, Աղազարյանը նշեց. «Լևոն Տեր-Պետրոսյանի շրջապատում այսօր էլ կան շատ պատրաստված անհատներ, քաղաքական գործիչներ, որոնք լուրջ գիտելիքների են տիրապետում, որոնց հնարավորությունները ճիշտ կլինի օգտագործել պետական կառավարման համակարգի տարբեր մակարդակներում:

Լևոն Տեր-Պետրոսյանի ֆենոմենը մաքսիմալացվում է: Ի՞նչ է նշանակում՝ նրա շրջապատից է այդ մարդը, միգուցե Տեր-Պետրոսյա՞նն է նրա շրջապատից, չէ՞ որ մարդը սոցիալական էակ է, և մեկը մեկից ինչ-որ բան ստանում են: Ընդունենք, որ Տեր-Պետրոսյանի ինտելեկտուալ հնարավորությունները բոլորիցս բարձր է, բայց ով շփվել է նրա հետ ու ինչ-որ բան է սովորել իրենից, դառնում է իր գերին կամ սեփականությո՞ւնը: Բոլորովին ոչ… Տեր-Պետրոսյանն ունեցել է նաև լուրջ թերություններ հենց այն իմաստով, որ փորձել է իր նեղ շրջապատում պահել այն մարդկանց, ովքեր արժեք են ներկայացնում, և ով Տեր-Պետրոսյանի շրջապատից մի քայլ այն կողմ է գնացել, նրան դավաճանի պիտակ են կպցրել. դա անընդունելի է»:

Մանրամասները՝ տեսանյութում: