16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Նոր սկանդալ ԱԺ-ում․ Ռուբիկ Հակոբյան-Սիսակ Գաբրիելյան լեզվակռվի բոլոր երանգները․ ՏԵՍԱՆՅՈՒԹ
Քաղաքականություն
26.01.2022 | 19:30
Փոխադարձ վիրավորանքների հերթական չափաբաժինն Ազգային ժողովում։ Մի քանի օր լարված մթնոլորտում ընթացող կրթության հանձնաժողովի նիստը վերածվեց փողոցին բնորոշ լեզվակռվի, որտեղ բառերն ամենևին կիրթ չէին։
Վիճաբանությունը սկսվեց այն պահից, երբ «Հայաստան» և «Պատիվ ունեմ» խմբակցությունների կողմից ՀՌՀ անդամի թեկնածու առաջադրված Ռուբիկ Հակոբյանը քննադատեց իշխանական պատգամավոր Նարեկ Բաբայանին, որը մեկ այլ պատգամավոր՝ Լենա Նազարյանի ամուսինն է. պատգամավորներին չհաջողվեց արագ հանդարտեցնել Ռուբիկ Հակոբյանին և ԿԳՄՍ, սփյուռքի և երիտասարդության հարցերի հանձնաժողովի նախագահ Սիսակ Գաբրիելյանին։
Հանձնաժողովում ծագած սկանդալը լսելի էր նաև ԱԺ միջանցքում, ինչի արդյունքում թեժ լեզվակռվին միջամտեց նաև իշխանական պատգամավոր Արմեն Խաչատրյանը։ Այսպիսով, Ռուբիկ Հակոբյանը հրաժարվեց ՀՌՀ անդամի թեկնածությունից։
Հատկանշական է, որ նման բառապաշարով խոսույթ գործող խորհրդարանում բազմիցս է արձանագրվել։ Factor TV-ն մշտապես փորձում է ատելության խոսք և անվայելուչ բառապաշար չհրամցնել իր հետևորդներին, սակայն մյուս կողմից հետզհետե դժվարանում է մեր աշխատանքն այս առումով, քանի որ նման միջադեպերը գրեթե ամենշաբաթյա բնույթ են կրում։
«Օրենքի պահանջ է, որ եթե ՀՌՀ 6 անդամները տղամարդիկ են, յոթերորդը պետք է կին լինի, և այս համատեքստում անհասկանալի է, թե ինչու է ընդդիմադիր դաշինքն առաջադրել Հակոբյանի թեկնածությունը»,- նկատում է Երևանի մամուլի ակումբի նախագահ Բորիս Նավասարդյանը՝ շեշտելով, որ արձանագրված հերթական միջադեպն անընդունելի է։
Մանրամասները՝ տեսանյութում։
Մերի Մարտիրոսյան
