10.02.2026 | 15:16
Ռուբեն Վարդանյանի գործով դատավորների կազմը հեռացել է խորհրդակցական սենյակ՝ դատավճիռ կայացնելու
Արմեն Սարգսյանի վերաբերյալ «Հետք»-ի հրապարակումն ուղարկվել է ԱԱԾ
Քաղաքականություն
25.01.2022 | 13:42
Դատախազությունը Արմեն Սարգսյանի՝ մինչև նախագահ դառնալը այլ երկրի քաղաքացի լինելու մասին «Հետք»-ի հրապարակումն ուղարկել է Ազգային անվտանգության ծառայություն: Այս մասին Factor.am-ին տեղեկացրեց գլխավոր դատախազի խորհրդական Գոռ Աբրահամյանը։
Հիշեցնենք՝ «Հետք»-ը երեկ գրել էր, որ նախագահ Արմեն Սարգսյանի հրաժարականի պատճառն այն է, որ նա, ՀՀ քաղաքացի լինելուց բացի, նաև այլ երկրի քաղաքացի է եղել առնվազն մինչև նախագահ դառնալը:
«Արմեն Սարգսյանը Կարիբյան ծովում գտնվող փոքր երկրի՝ Սենթ Քիթս և Նևիսի քաղաքացի է եղել»,- գրել էր «Հետք»-ը։
«Նկատի ունենալով, որ նշված հանգամանքները ստուգելու անհրաժեշտություն կար, մենք հրապարակումն ուղարկել ենք ԱԱԾ։ Արմեն Սարգսյանի երկքաղաքացիության փաստը թաքցնելու դեպքի առթիվ դեռևս 2021 թվականի ապրիլին հարուցվել է քրեական գործ՝ փաստաթղթեր կեղծելու հատկանիշներով: Հրապարակումն այս գործի շրջանակում կդառնա ստուգման առարկա»,- ասաց Աբրահամյանը։
«Հետք»-ի տեղեկության համաձայն՝ նախագահն ուներ Սենթ Քիթս և Նևիսի անձնագիր, ինչը հաստատվել է Սարգսյանի հետ նամակագրության ընթացքում:
ՀՀ Սահմանադրության համաձայն՝ հանրապետության նախագահին ներկայացվող պահանջներից է վերջին վեց տարում միայն Հայաստանի Հանրապետության քաղաքացի լինելը և վերջին վեց տարում Հայաստանում մշտապես բնակվելը:
Արփի Հակոբյան
