Ո՞րն էր Գյումրիի տարբեր թաղամասերում գազի հոտի տարածման պատճառը

Գյումրիի տարբեր թաղամասերում երեկ ուշ երեկոյան մոտ 2-2,5 ժամ շարունակ գազի ուժեղ հոտ է տարածվել։ Խնդիրն անհանգստություն էր առաջացրել քաղաքի բնակչության մոտ, շատերը գրառումներ էին կատարում սոցիալական ցանցերում, հարցեր ուղղում լրատամիջոցներին ու պաշտոնյաներին, զանգահարում ԱԻՆ-ի 911 թեժ գիծ։ Չնայած Գյումրիում տարածված անհանգստություններին՝ Շիրակ ԳԳՄ-ն պաշտոնական որևէ հայտարարությամբ հանդես չէր եկել։ Պարզաբանում հնչել է միայն մարզպետի ահազանգից հետո։

Ըստ այդմ՝ խնդիրը ծագել է օդորանտի՝ հոտավետիչ նյութի սահմանված չափաբաժնից ավելի ներարկելու պատճառով։ Հոտավետիչ նյութը սովորաբար ավելացվում է անհոտ բնական գազին, որպեսզի արտահոսքի դեպքում այն աննկատ չմնա։

Շիրակի մարզպետ Նազելի Բաղդասարյանը զանգահարել էր Շիրակ ԳԳՄ-ի տնօրենի պարտականությունները կատարող Արտակ Գալստյանին ու կատարել հետևյալ գրառումը․ «Հարգելի´գյումրեցիներ, քիչ առաջ հեռախոսազրույց եմ ունեցել Շիրակ ԳԳՄ-ի տնօրենի պարտականությունները կատարող Արտակ Գալստյանի հետ:

Տարածված հոտը մասնաճյուղի փորձարկման աշխատանքներում «օդորանտ»-ի սահմանված չափաբաժնից ավելի ներարկման արդյունքն է: Վերջինիս վստահեցմամբ՝ ընդամենը հոտ է և ոչ գազի արտահոսք։

Ցանկացած պարագայում նման փորձարկումների մասին պետք է նախապես ծանուցել բնակչությանը, ինչը պատշաճ ձեւով չի իրականացվել: Շիրակ ԳԳՄ-ի ղեկավարությանը հորդորել եմ հետայսու ցանկացած աշխատանքի իրականացման պարագայում տեղեկացնել Շիրակի մարզպետարանին և հետևողական լինել իրենց գործում»:

Արմիկ Մովսիսյան