Կրակելու դեպքում մեզ վրա էինք կրակելու․նախկին գերու պատմությունը․ ՏԵՍԱՆՅՈՒԹ

Իրավիճակը հասարակությանը այլ կերպ է ներկայացվել, այդ իսկ պատճառով հասարակությունն աղավաղված պատկեր տեսավ, Factor TV-ի հետ զրույցում ասում է նախկին գերի Մելս Ամբարդարյանը, որը 61 զինծառայակիցների հետ գերեվարվել էր Խծաբերդի տարածքից՝ նոյեմբերի 9-ի եռակողմ հայտարարության ստորագրումից հետո։

«Իմ ցուցմունքից հանել են ընտրովի հատված, հրապարակել, որ Շիրակի մոբիլիզացիան հանձնվել է 6-7 ադրբեջանցի զինվորների, այդ հատվածն են դուրս գրել իմ ամբողջ ցուցմունքից, բայց ես նաև ասել եմ, որ թիկունքում տեսել ենք մի ամբողջ գումարտակ»,- պատմում է Մելսը։

Հրամանատարը հեռախոսով հրահանգել է շարժվել դեպի Կունգ կոչվող հատվածը, որտեղ իրենց «Ֆորդ» մեքենաներ պետք է դիմավորեին և տեղափոխեին Հայաստան, սակայն տեղ հասնելուն պես հանդիպել են ադրբեջանցի զինվորներին։

«Մեզ ասել էին, որ մեզ դիտարկելու են սարերից և հետևելու են մեր ընթացքին, իրականում մեզ դիտարկողները ոչ թե մեր հայրենակիցներն էին, այլ ադրբեջանցիները, որ մեզ դիտարկեցին ու ուղեկցեցին էդ ճանապարհով»,- հիշում է Մելս Ամբարդանյանը։

Ինչ վերաբերում է քննադատություններին, թե ինչո՞ւ չեն կրակել, պատմում է, որ հասել էին մի վայր, որտեղ մարտեր վարել չէին կարող, կրակելու և ընդդիմանալու դեպքում իրենց վրա էին կրակելու։ Բացի այդ՝ վստահ էին, որ մյուս ընկերների պես իրենք էլ են հայրենիք վերադառնալու, հակառակ դեպքում, առաջինն ինքը կկրակեր իր վրա։

Մանրամասները՝ տեսանյութում։

Սաթենիկ Հայրապետյան