Միայնակ բնակվող ցրտահարված գյումրեցի կնոջը տեղափոխել են Երևան բուժման․ ՏԵՍԱՆՅՈՒԹ

Գյումրու Բուլվարային թաղամասի գործարանային 2 Ա շենքի 44-ամյա ցրտահարված, միայնակ ապրող բնակչուհուն, որին երեկ երեկոյան Շիրակի մարզպետ Նազելի Բաղդասարյանի միջամտությամբ հոսպիտալացրել էին Գյումրի բժշկական կենտրոն, առաջին բուժօգնություն ցուցաբերելուց հետո այսօր առավոտյան ուղարկել են Այրվածքաբանության ազգային ինստիտուտ՝ մասնագիտացված բուժման։

Այս մասին մեզ տեղեկացրեց Գյումրի բժշկական կենտրոնի փոխտնօրեն Արմեն Խաչատրյանը։ Նա մանրամասնեց, որ հիվանդն իրենց մոտ է տեղափոխվել զույգ ոտնաթաթերի ցրտահարություն ախտորոշմամբ։

«Հիվանդը հունվարի 15-ին շտապբուժօգնության մեքենայով դիմել էր մեզ՝ նույն աշխտորոշմամբ, սակայն ավելի քիչ ախտահարումով։ Զննվել էր անոթային վիրաբույժի կողմից, նրա մոտ ախտորոշվել է ցրտահարություն, կատարվել է վիրակապ»,-ասաց Արմեն Խաչատրյանը։

Հիվանդանոցի փոխտնօրենը նշում է, որ հաճախակի են իրենց մոտ տեղափոխում ցրտահարված հիվանդների։ Այս պահին էլ օրգանիզմի գերսառեցմամբ հիվանդ է պառկած իրենց մոտ։

Արմեն Խաչատրյանն ասում է` այս հարցերին այլ դիտանկյունից պիտի նայել, որովհետև սրանք սոցիալական խնդիրներ են։

«Այս հիվանդը ունի սոցիալական այլ հիվանդություններ, կախվածություններ, հետևաբար և անձի խնդիրները պիտի դիտվեն ոչ միայն առողջապահական ոլորտով, այլ բոլոր ոլորտներով», -ասում է մեր զրուցակիցը։

Նշենք, որ այս կնոջ բնակության ծանր պայմանների մասին բարձրաձայնել էր սոցիալական խնդիրներով զբաղվող «Շիրակ կենտրոն» հ/կ նախագահ Վահան Թումասյանը, որը տեսանյութ էր տեղադրել։ Արձագանքել էր Շիրակի մարզպետը՝ այցելելով կնոջը և հանձնարարել տեղափոխել Գյումրի բժշկական կենտրոն։

«Արդեն պայմանավորվածություն է ձեռք բերվել Աշխատանքի և սոցիալական հարցերի նախարարի հետ, առաջիկայում համատեղ ջանքերով կփորձենք լուծել կնոջ կեցության հարցը»,- տեղեկացրել էր մարզպետը:

Մանրամասները՝ տեսանյութում։

Արմիկ Մովսիսյան