16.04.2026 | 17:17
Հոկեյի Շվեյցարիայի հավաքականի գլխավոր մարզիչին հեռացրել են փաստաթղթեր կեղծելու համար
ՀՀ-ի թիկունքին խրված դանակ է ՀԱՊԿ-ն, պաշտպան չէ․ ՌԴ-ն է մյուսների ականջից բռնած տանում-բերում․ Վարուժան Ավետիսյան․ ՏԵՍԱՆՅՈՒԹ
Քաղաքականություն
17.01.2022 | 20:47
Factor TV-ի զրուցակիցը Ազգային-ժողովրդավարական բևեռի խորհրդի անդամ Վարուժան Ավետիսյանն է
-Պարո՛ն Ավետիսյան, Ադրբեջանը պարբերական սադրանքներ է սանձազերծում ՀՀ սահմանագծին և Արցախում։ Ո՞րն է ՀՀ-ի հակաքայլի հնարավորությունը՝ հաշվի առնելով անվտանգային այն համակարգերն ու կոնցեպտները, որոնցում գտնվում ենք։ Մեկը, օրինակ, ՀԱՊԿ-ի ներկայացուցիչ ենք։ Ժողովուրդը դժգոհում է, որ ՀԱՊԿ-ն սադրանքների պահին ձայն չի հանում։ Ի՞նչ է մնում անելու ՀՀ-ին՝ լավ իմանալով, թե ինչ գործիքներ են տրվել մեր ձեռքը։
-Դրանք հաշվի առնենք՝ կոչնչանանք։ Դրանք մեր ձեռքի գործիքները չեն, այլ մեր թիկունքում խրված դանակներ են։ Դրանք գործիք չեն մեզ համար, և եթե Նիկոլ Փաշինյանին ու Արմեն Գրիգորյանին թվում է՝ իրենք ՀԱՊԿ-ի մեխանիզմներ են աշխատեցրել, ուրեմն՝ իրենք ոչինչ չեն հասկանում պետությունից։ Նման բան գոյություն չունի․ ես հինգ տարի ՊՆ-ում ՀԱՊԿ-ի ուղղությամբ եմ զբաղվել։ Որպես կազմակերպություն՝ ՀԱՊԿ-ն չկա, դա թղթե կառույց է, կա միայն Ռուսաստան։
-Կամ էլ կա կառույց, որը պետությունների ներքաղաքական խնդիրներին միջամտելու գործառույթ է կատարում։ Ղազախստանի դեպքերն այդ հանգամանքը պարզ ցույց տվեցին։
-Չէ՛, էլի Ռուսաստանն է։ Մյուսների ականջից ուղղակի բռնում-տանում է Ռուսաստանը։ Չեն կարող հակառակվել, երբ անհրաժեշտ է լինում, անում է դա։ ՀԱՊԿ-ն բռնապետերի ակումբ է, մեծ բռնապետից կախված են և, բնականաբար, նրա հանձնարարությունները կատարում են։ Դեռ որ կատարում են, կգա ժամանակ, որ չեն անելու։ Բայց դեռ կատարում են։
-Ինչո՞ւ հայ-ադրբեջանական սահմանին կրակոցների ժամանակ ՀԱՊԿ-ն ձայն չի հանում։
-Առանց Ռուսաստանի համաձայնության դա չի լինում։ ՌԴ-ի համաձայնությամբ են կրակում Հայաստանի վրա, սպանում հայերին, առևանգում, գերեվարում։ Ամեն ինչ արվում է ՌԴ-ի համաձայնությամբ։ Կա՛մ նախապես են համաձայնեցնում, կա՛մ հետագայում տեղեկացնում են՝ որպես ի գիտություն։
-Պուտինին հաճելի՞ է ամեն էսկալացիայից հետո զանգ ստանալ Փաշինյանից և բողոքներ լսել Ադրբեջանից։
-Փաշինյանը ոչ մի բողոք էլ չի ներկայացնում։ Ես չեմ հավատում դրան, միգուցե՝ արհեստական, մակերեսային․․․ Ոչ մի բան էլ չի ներկայացնում։
Հարցազրույցն ամբողջությամբ՝ տեսանյութում։
Ռոբերտ Անանյան
