13.01.2025 | 11:39
«Եռաբլուրից» գողացված ծաղիկները վաճառել են Հյուսիսային պողոտայում՝ մեկ հատը 500-ից 1000 դրամով. երկու անձ կալանավորվել է․ ՔԿ
Ինչո՞ւ Քոչարյանի օրոք չէր հայտարարվում գաղտնի բանակցությունների մասին․ Ռուբինյան. ՏԵՍԱՆՅՈՒԹ
Քաղաքականություն
17.01.2022 | 11:15
«Այս գործընթացում Թուրքիան և Հայաստանը գործուղել են հատուկ ներկայացուցիչների, ոչ թե բանագնացների։ Հատուկ ներկայացուցիչը մեր դեպքում պաշտոն չէ, գործառույթ է, այսինքն՝ ես չեմ նշանակվել որևէ պաշտոնի, ես ինչպես հանդիսանում էի ԱԺ փոխնախագահ, հիմա էլ շարունակում եմ հանդիսանալ, բայց իրականացնում եմ նաև հատուկ ներկայացուցչի գործառույթը, որը ինձ պատվիրակվել է հրապարակայնորեն, այդ թվում՝ փաստվել է ՀՀ ԱԳՆ հայտարարությամբ»,- այս մասին ԱԺ նիստին հայտարարեց ԱԺ փոխնախագահ Ռուբեն Ռուբինյանը:
Անդրադառնալով ընդդիմադիրների մեղադրանքների՝ ինչո՞ւ է ԱԺ բյուջեի հաշվին մեկնել Մոսկվա, Ռուբեն Ռուբինյանն արձագանքեց. «Բա ինչո՞վ պետք է մեկնեի, ծրարով փող ստանայի, գնայի տոմս առնեի, գնայի՞։ Հարցնում եք ինչու եմ ԱԺ-ի՞ բյուջեով մեկնել, ինչու ԱԺ-ն առանձին կառույց է, որը պետության հետ կապ չունի՞»,- ասաց ԱԺ փոխնախագահը:
Անդրադառնալով Մոսկվայում իր և Թուրքիայի հատուկ ներկայացուցիչ Սերդար Քըլըչի հանդիպման վերաբերյալ քննադատություններին և արձագանքելով Գեղամ Մանուկյանի հարցին, թե ինչու է Հայաստանի և Թուրքիայի հատուկ ներկայացուցչների հանդիպմանը թուրք բանագնացը դրոշով մեքենայով գալիս, հայկական կողմը՝ ոչ, Ռուբինյանը պարզաբանեց, որ մինչև հատուկ ներկայացուցիչների հանդիպումը, երկու ներկայացուցիչները հանդիպում են ունեցել ՌԴ փոխարտգործնախախարի հետ, որին Թուրքիայի հատուկ ներկայացուցիչը գնացել է ՌԴ-ում Թուրքիայի դեսպանի հետ ու մեքենան, և ամենայն հավանականությամբ, Թուրքիայի դեսպանի մեքենան է եղել:
Ռուբինյանն անդրադարձավ նաև ընդդիմադիրների այն քննադատություններին, թե Թուրքիայի հետ տեղի են ունենում գաղտնի գործընթացներ:
«Հայաստանի պատմության ընթացքում Թուրքիայի հետ տեղի են ունեցել բանակցություններ բոլոր նախագահների օրոք, ընդ որում՝ տարբեր ֆորմատների: Ի՞նչ եք կարծում, այդ բանակցությունների քանի տոկոսն է եղել գաղտնի, և քանիսը՝ բաց: Ավելի շատ տոկոսը եղել է գաղտնի, քան բաց: Օրինակ՝ նույն ֆուտբոլային դիվանագիտությունը, որի հրապարակային մասը սկիզբ է առել Սերժ Սարգսյանի նախագահության օրոք. ըստ ձեզ՝ այդ գործընթացի ոչ հրապարակային մասը սկիզբ է առել Սերժ Սարգսյանի՞ նախագահության օրոք: Ո՛չ, սկիզբ է առել Ռոբերտ Քոչարյանի նախագահության օրոք: Հարց. արդյո՞ք գաղտագողի գործընթացներ էին տեղի ունենում Հայաստանի և Թուրքիայի միջև, և ինչո՞ւ Ռոբերտ Քոչարյանի նախագահության օրոք չէր հայտարարվում գաղտնի բանակցությունների մասին:
Սա միակ դեպքն է, երբ սկսվում է Հայաստան-Թուրքիա հարաբերությունների կարգավորման գործընթաց, և այդ գործընթացի առաջին իսկ կետը հրապարակային է»,- ասաց Ռուբինյանը:
Մանրամասները՝ տեսանյութում:
