Պոլինեզիայում ստորջրյա հրաբխի ժայթքումը հզոր ցունամիներ է առաջացրել

Պոլինեզիայում Տոնգա-Խունգա-Հաապայ ստորջրյա հրաբխի ժայթքումը հզոր ցունամի է առաջացրել խաղաղօվկիանոսյան տարածաշրջանի մի շարք պետությունների ափերի մոտ:

DW-ի փոխանցմամբ՝ Ավստրալիայի օդերևութաբանության բյուրոն հունվարի 15-ին հայտնել է, որ մայրաքաղաք Նուկուալոֆի շրջանում ալիքների բարձրությունը ծովի մակերևույթից հասել է 1,2 մետրի:

Ճապոնիայի հարավ-արևմուտքում գտնվող Ամամի կղզիների և երկրի հյուսիս-արևելքում գտնվող Իվատե պրեֆեկտուրայի ափերին ևս 1,2 մետր բարձրությամբ ցունամի է գրանցվել:

Ավստրալիայի հարավարևելյան ափին գտնվող մի շարք շրջաններում նույնպես ցունամիի նախազգուշացում է եղել:

Տոնգայի թագավորությանը լուրջ վնաս է հասցվել, հաղորդել է AFP գործակալությունը: Նուկուալոֆի փողոցները ծածկված են հրաբխային մոխրի հաստ շերտով, սակայն  իրավիճակը հանգիստ է և կայուն՝ պարզաբանել է Նոր Զելանդիայի կառավարության ղեկավար Ջասինդա Արդերնը: Տոնգա արշիպելագի մի շարք բնակիչների խոսքով՝ հրաբխի ժայթքման աղմուկը կարելի էր համեմատել ռումբերի պայթյունի ձայնի հետ: Վիրավորների կամ զոհերի մասին տեղեկություններ դեռ չեն ստացվել։ ԱՄՆ-ն և ՄԱԿ-ն իրենց օգնությունն են առաջարկել կղզի-պետությանը։

Հզոր ալիքների պատճառով Սամոայում հարյուրավոր ընտանիքներ տարհանվել են Սավայի կղզու հարավային կողմում գտնվող գյուղերից։ Ստորջրյա հրաբխի ժայթքումը սկսվել է հունվարի 14-ին։ Աղետի հետևանքով ավերվել են մի շարք տներ, վնասվել են ավտոմեքենաներ և ենթակառուցվածքներ։