15.09.2026 | 21:24
Հրապարակվել են հոկտեմբերի 25-ին կայանալիք ՏԻՄ ընտրությունների ընտրողների ցուցակները
«Փախե՞լ ա, գտե՛ք՝ դատե՛ք»․ ինչ է պատմում մայրը 8 ամիս անհետացած որդուց. ՏԵՍԱՆՅՈՒԹ
Հասարակություն
13.01.2022 | 12:34
Նորիկ Մկրտչյանը բանակ է զորակոչվել 2021 թվականի փետրվարի 8-ին, ծառայել մինչև մայիսի 14-ը։ Այդ օրվանից ընտանիքը որդու մասին որևէ տեղեկություն չունի։ Նորիկը ծառայում էր Վարդենիսի N զորամասում․ հրամանատարությունը ևս լուր չունի, թե 8 ամիս շարունակ որտեղ է զինվորը։
Փաստաբան Լուսինե Վիրաբյանը Factor.am-ին հայտնեց, որ Նորիկը ուսումնական զորամասում ծառայություն է իրականացրել, պարբերաբար հեռախոսազանգի, նամակագրության միջոցով շփվել է ընտանիքի հետ, սակայն մայիսի 14-ից կապը կորել է և մինչ օրս ընտանիքը իրենց որդուց տեղեկություն չունի։
«Թե ինչ է պատահել՝ շատ առեղծվածային է։ Զորամասի հրամանատարությունը հայտնում է, որ մայիսի 18-ին են նկատել Նորիկի բացակայությունը, չգիտեմ՝ ոնց է այդպես հնարավոր ու շատ հակասական ինֆորմացիա են տալիս․ մեկն աում է՝ լուսադեմին է անհետացել Նորիկը, մյուսն ասում է՝ երեկոյան, մեկ ուրիշը ասում է՝ վրանում քնած են եղել 6 հոգի, արթնացել են, տեսել, որ Նորիկը չկա։ Այս պահին դասալքության դեպքով գործ է հարուցված, սակայն որևէ մեկը այլ վարկած չի քննում, որովհետև 8 ամիս շարունակ առանց աջակցության, առանց ծնողի իմացության, առանց ֆինանսավորման ուղղակի չէր կարող ինչ-որ մի տեղ թաքնվել։ Գերի ընկնելու որևէ տարբերակ չկա, որովհետև ինքը դիրքերում չի եղել, անգամ հրաժարվել է դիրքեր բարձրանալ, քանի որ նոր էր բանակ զորակոչվել և առաջին անգամ պետք է դիրքեր բարձրանար։ Այդ պայմաններում, բնականաբար, հոգեբանորեն չի հաղթահարել, հրաժարվել է, ասել է, որ չի կարող բարձրանալ, բայց թե ինչ է կատարվել, կարծում եմ, որ քննությունը պետք է պարզի,- պատմում է փաստաբանը։
Լուսինե Վիրաբյանը զարմանում է, եթե հետախուզման մեջ է Նորիկը, մի՞թե իրավապահ մարմիններն այնքան անկարող են, որ 8 ամիս շարունակ չեն կարողանում գտնել զինվորին։
Factor.am-ը խնդրի առնչությամբ հարցում է ուղարկել Պաշտպանության նախարարություն, իսկ մինչ այդ զրուցել ենք նաև Նորիկ Մկրտչյանի մոր՝ Լիլիթ Աղաբաբյանի հետ։
Մայրը որդու անհետացումից Factor.am-ին այլ մանրամասներ է պատմում, ասում է՝ զորամասից իրենց անգամ չեն տեղեկացրել, որ Նորիկը անհետացել է։ Լիլիթը ընդգծում է՝ որդին առողջական խնդիրներ էլ ուներ և այդ վիճակով ուղղակի չէր կարող դիրքեր բարձրանալ։ Մոր խոսքով՝ Նորիկն ինքն է խնդրել որոշ ժամանակ տրամադրել, սակայն հրամանատարը ստիպելով տարել է դիրքեր։
Հիշեցնենք, որ մայիսի 22-ին Պաշտպանության նախարարությունը տեղեկություն տարածեց, որ մայիսի 18-ին Ռազմական ոստիկանության Վարդենիսի բաժին ահազանգ է ստացվել այն մասին, որ ժամկետային զինծառայող, շարքային Ն. Մկրտչյանը ինքնակամ թողել է ստորաբաժանման պահպանության տարածքը և ընդգրկված է զորամասն ինքնակամ թողած զինծառայողների ցուցակներում:
Մանամասները՝ տեսանյութում։
Արփի Հակոբյան
