16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Դեպի որակյա՛լ լրագրություն․ Factor.TV-ում փորձաշրջանն ավարտած ուսանողները պարգևատրվեցին․ ՏԵՍԱՆՅՈւԹ
Հասարակություն
12.01.2022 | 20:35
Կայացավ եվրոպական ամենահեղինակավոր հեռարձակողներին ներկայացնող Deutsche Welle Akademie-ի և BBC Media Action հետ համատեղ Factor TV-ում անցկացված եռամսյա լրագրողական հմտությունների փորձաշրջանի ամփոփման արարողությունը։ Աչքի ընկած ուսանողներին պարգևատրեցին Հայաստանում Եվրամիության պատվիրակության ղեկավարը, Գերմանիայի դաշնային հանրապետության և Մեծ Բրիտանիայի դեսպանները։
Մեկ տարի առաջ Եվրոպական միության ֆինանսական աջակցությամբ մեկնարկած այս ծրագրով հայաստանյան բուհերի լրագրության ֆակուլտետների ավագ կուրսերի ուսանողների համար հրաշալի հնարավորություն ստեղծվեց։ «Եվրոպական մեդիահարթակ Հայաստանում. հուսալի և պրոֆեսիոնալ լրատվամիջոցների կառուցում»՝ ծրագրի շրջանակներում ուսանողները BBC-ի կողմից անցկացվող վարպետության դասընթացն ավարտելուց հետո եռամսյա փորձաշրջան անցան Factor TV-ում։
2 խումբ, 12 ուսանող հատուկ իրենց համար պատրաստված ու անհրաժեշտ սարքավորումներով համալրված դասասենյակում զարգացրեցին իրենց տեսական և պրակտիկ գիտելիքները, աշխատեցին Factor TV-ի նյուզռումից, մասնակցեցին դատական նիստերի ու բողոքի ակցիաների, ուղիղ եթերում մեկնաբանեցին հանրային միջոցառումներ, պատրաստեցին վիդեոռեպորտաժներ և հարցազրույցներ վարեցին Factor TV-ի տաղավարից․ այս ամենին զուգահեռ նրանց համար վարպետության դասեր անցկացրեցին մեդիադաշտի հայտնի դեմքերը՝ ուսանողներին փոխանցելով իրենց հմտությունները սթորիթելինգի նրբությունների, հարցազրույցի վարման տեխնիկաների, բաց և փակ աղբյուրների հետ աշխատանքի, ֆակտչեքինգի, վիդեոմոնտաժի և մոբայլ լրագրության մասին։
Փորձաշրջանի ընթացքում ուսանողներից յուրաքանչյուրի երեքական նյութ հրապարակվեց Factor․am-ում, որոնցից լավագույնները առանձնացվեցին անկախ ժյուրիի կողմից։
Հայաստանում ԵՄ դեսպան Անդրեա Վիկտորին իր խոսքում նշեց, որ լրատվամիջոցների ազատությունը և կրթությունը եվրոպական արժեքների հիմքում են ընկած։ «Այսօր տեղեկություններ կարելի է ստանալ վայրկյանական, բայց դա մեզ ավելի ազատ կամ կրթված չի դարձնում։ Իրականում դա կյանքն ավելի է դժվարացնում, քանի որ պետք է կարողանալ տարանջատել իսկական լրատվությունը՝ կեղծից։ Ես ուրախ եմ, որ Ֆակտոր TV-ն պայքարում է նաև ատելության խոսքի դեմ։ Ես շատ եմ սիրում ձեր երկիրը և ինձ մեծ շոկի մեջ էր դնում այստեղ ատելության խոսքի մակարդակը։ Մեզ պետք են լավ լրագրողներ, հետաքննական լրագրություն, որ մարդիկ ունենան ընտրության հնարավորություն և հենց այստեղ է կարևորովում նման ծրագրերի անցկացումը»։
Հայաստանում Միացյալ Թագավորության դեսպան Ջոն Գալագերն էլ նշեց, որ այն արժեքավոր աշխատանքը, որ անում է Factor TV-ն և, ընդհանրապես, անկախ մեդիան այստեղ՝ Հայաստանում, հիմք է ստեղծում ապագայի հաջողակ պետության համար։ «Այսպիսով՝ սա իսկապես արժեքավոր մի բան է և հուսով եմ, որ բոլորը դա գիտակցում են»։
Լրատվամիջոցների բազմազանության ֆոնին, այսօր հայկական լրատվական դաշտում տիրող իրավիճակը տագնապալի ու մտահոգիչ է որակում Խոսքի ազատության ու պաշտպանության կոմիտեի նախագահ Աշոտ Մելիքյան՝ ողջունելով ցանկացած քայլ ու նախագիծ, որ կարող է նպաստել այդ իրավիճակի բարելավմանն ու առողջացմանը։
Factor TV-ի դռները միշտ բաց կմնան ծրագրի մասնակիցների առաջ՝ վստահեցրեց Factor TV-ի նախագահը։
«Եվոպական մեդիահարթակ Հայաստնում․ հուսալի և պրոֆեսիոնալ լրատվամիջոցների կառուցում» եռամյա ծրագրի առաջին փուլը հաջողությամբ ավարտված է․ առաջիկայում Factor TV-ին իր դռները կբացի ուսանողների նոր խմբի առջև։
Մանրամասները՝ տեսանյութում։
Սաթենիկ Հայրապետյան
