15.09.2026 | 21:11
Ալիևը Եվրախորհրդարանը «կոռուպցիոներների որջ» է անվանել ու եվրոպական կառույցներին մեղադրել ՀՀ-ին աջակցելու մեջ
Հունվարի 3-ին խցանում կար, նշանակում է՝ տնտեսական աշխուժություն կա, տարին առույգ կսկսենք. Քերոբյան. ՏԵՍԱՆՅՈՒԹ
Տնտեսություն
12.01.2022 | 13:02
Ամանորի ոչ աշխատանքային օրերի կրճատումը տնտեսապես արդարացված է։ Այսօր ԱԺ–ում լրագրողների հետ ճեպազրույցում ասաց ՀՀ էկոնոմիկայի նախարար Վահան Քերոբյանը։
«Հունվարի 3-ին, ժամը 4-ին հանդիպում ունեի, և այն մարդը, որ պետք է գար, 10 րոպե ուշացավ, եկավ, ասաց. «Խցանում էր, դրա համար ուշացա»։ Նման բան Հայաստանում երբեք չի եղել հունվարի 3-ին, և ես կարծում եմ, որ այն տնտեսական աշխուժությունը, որ մենք արդեն տեսնում ենք, թույլ է տալիս ասել, որ մենք բավական լավ, առույգ ենք սկսել տարին»,- նշեց Քերոբյանը։
Էկոնոմիկայի նախարարի խոսքով՝ մանրածախ առևտրի կետերի ու խոշոր արդյունաբերական ընկերությունների հետ շփումների ժամանակ նրան հայտնել են, որ նախորդ տարիների համեմատ շատ մեծ փոփոխություն են նկատել։
«Պետք է սպասենք թվերին, բայց ես կարծում եմ, որ դրանք կգերազանցեն այն թվերը, որ մենք ներկայացրել էինք այդ նախագծի ներկայացման ժամանակ»,- նշեց նախարարը։
Հիշեցնենք` 2020թ. նոյեմբերի 17-ի նիստում Ազգային ժողովը, կառավարության առաջարկով, հաստատել էր «Տոների և հիշատակի օրերի մասին» օրենքի փոփոխված նախագիծը: Դրանով կրճատվել էին ամանորյա տոնական ու ոչ աշխատանքային օրերը։
Այս տարվանից սկսած` ՀՀ աշխատող քաղաքացիների համար հանգստյան օրեր են դեկտեմբերի 31-ից մինչև հունվարի 2-ը ներառյալ, և հունվարի 6-ը՝ Սուրբ ծնունդը:
Ամանորի ոչ աշխատանքային օրերի քանակը կրճատելու առաջարկի հիմնավորման ժամանակ Քերոբյանը հայտարարել էր, որ երկարատև Ամանորի պատճառով ՀՀ պետական բյուջեն տարեկան ՀՆԱ–ի մոտ 88 միլիարդ դրամի չափով գումար է կորցնում։
Մանրամասները՝ տեսանյութում:
