Քաղաքականություն
30.12.2021 | 18:05
Թուրքիայի նախագահի մամուլի խոսնակ, անվտանգության հարցերով խորհրդական Իբրահիմ Քալընը «Անադոլու» գործակալության հետ զրույցում անդրադարձել է Հայաստանի հետ հարաբերությունների կարգավորմանը։
Նա հիշեցրել է, որ Թուրքիան 1990-ականներին փակել է Հայաստանի հետ սահմանը ի պատասխան Երևանի՝ «Ադրբեջանի նկատմամբ օկուպացիոն քաղաքականության»։
«44-օրյա պատերազմի արդյունքում Ղարաբաղի խնդիրը դուրս եկավ, իսկ դա նշանակում է, որ հարաբերությունների կարգավորման բանակցությունների ճանապարհին ոչ մի խոչընդոտ չի մնացել։ Նախագահ Էրդողանը հենց սկզբից ասում էր, որ Թուրքիայի և Հայաստանի երկխուսությունն ու Հայաստանի և Ադրբեջանի միջև հարաբերությունները զուգահեռ հարցեր են։ Այսօր կողմերն արդեն նշանակել են հատուկ ներկայացուցիչների երկխոսության համար։ Կարծում եմ, որ գործընթացը շարժվելու է կառուցողական ու արագ։ Հայկական կողմն ունի համապատասխան կամք, Անկարայի դիրքորոշումը ևս չափազանց բաց է»,- ասել է Քալընը։
Նա նշել է, որ Թուրքիան Հայաստանի նկատմամբ կանխակալ վերաբերմունք չունի։
«Իհարկե, մենք ցանկանում ենք դիվանագիտական հարաբերությունների հաստատում և սահմանների բացում հարևան պետության հետ։ Դա առաջին հերթին համապատասխանում է Հայաստանի շահերին․ ոչ մեծ երկրի՝ առանց ելքի դեպի ծով ու ոչ մեծ բնակչությամբ։ Ադրբեջանի և Թուրքիայի հետ կապերի հաստատումն օգուտ կբերի հատկապես հայ ժողովրդին»,- ասել է Էրդողանի խոսնակը։
Միաժամանակ, Քալընը հայտարարել է, որ հայկական սփյուռքը «պետք է կշռադատված վերաբերվի Հայաստանի ու Թուրքիայի երկխոսությանը, այդ թվում՝ Հայոց ցեղասպանության հարցում», որը Քալընը, թուրքական թեզերին համահունչ, անվանել է «հորինված»։
«Որոշակի իրադարձությունները ցեղասպանություն անվանելը ոչ մեկին օգուտ չի տալիս։ Հարավային Կովկասում նոր էջ է բացվել, և սփյուռքը պետք է գիտակցի դա»,- ասել է Քալընը։
Էմմա Չոբանյան
