16.04.2026 | 17:17
Հոկեյի Շվեյցարիայի հավաքականի գլխավոր մարզիչին հեռացրել են փաստաթղթեր կեղծելու համար
Իրանը Հայաստանին որպես լոկ հարևան չի վերաբերվում, այլ՝ իր հյուսիսարևմտյան մասի անվտանգության երաշխավորի. Ռոբերտ Բեգլարյան․ ՏԵՍԱՆՅՈՒԹ
Քաղաքականություն
30.12.2021 | 19:32
44-օրյա պատերազմից հետո ստեղծված իրավիճակն արագացրեց Կապանում Իրանի գլխավոր հյուպատոսության բացումը։ Factor TV-ի հետ զրույցում նման կարծիք հայտնեց Իրանի Մեջլիսի հայազգի պատգամավոր Ռոբերտ Բեգլարյանը՝ խոսելով հայ-իրանական հարաբերությունների զարգացման ներկայիս դինամիկայի մասին։
«Արդեն հստակորեն հայտարարվել է, որ կառավարությունը հաստատել է այդ որոշումը և մեկնարկել է գործընթացը»,- ասաց նա։
Սյունիքի մարզում հյուպատոսություն բացելով, ըստ պատգամավորի, Իրանը վերստին ընդգծում է Հայաստանի տարածքային ամբողջականություն անխախտելիության վերաբերյալ իր մոտեցումը։
«Սա ցույց է տալիս, որ հարաբերությունների նոր փուլ ենք անցնում՝ տնտեսական հարաբերություններում նոր աճ արձանագրել, բոլորը կարոտ են վարչական և քաղաքական մեխանիզմների, ինչին պետք է հյուպատոսության նման հաստատությունն օգնի»,- նկատեց նա։
Ռոբերտ Բեգլարյանի խոսքով՝ Իրանը հիմա փորձում է առավելագույնս տեղեկացված լինել տարածաշրջանում կատարվողից, այդ իսկ պատճառով առավել ակտիվացրել է իր մասնակցությունը տարբեր ձևաչափերում։ Այս համատեքստում նա կարևորեց «3+3» ձևաչափի կայացումը։
«Իրանի համար կարևոր է այս ձևաչափի կայացումը, քանի որ Ռուսաստանի հետ հարաբերություններն այստեղ այլ ձև են ստանում։ Նաև Թուրքիայի ներկայությունն է այստեղ Իրանի համար ուշադրության արժանի։ Գուցեև Իրանը մտածում է, որ ներկա ժամանակահատվածում Հայաստանը հնարավորություններ չունի, որ վերջնագրային խոսք ասի տարբեր գործընթացներում։ Դրա համար նման ձևաչափը մինիմում հնարավորությունն է, որ և՛ իրազեկ լինի, և՛ փորձի կանխագուշակել, թե իրադարձությունները դեպի ուր են գնում, և՛ փորձի ազդել դրանց վրա»,- նշեց նա։
Իրան-Ադրբեջան հարաբերություններում նկատվող բարելավումը, լարվածության մարումը, ըստ իրանահայ պատգամավորի, չի կարող խանգարել հայ-իրանական հարաբերությունների զարգացմանը։
«Իրանն ուրիշ հաշիվ ունի Հայաստանի մասով։ Հիմա Իրանը Հայաստանին չի վերաբերվում որպես լոկ հարևան, լոկ միջանցք ԵՏՄ-ում։ Իհարկե, սրանք են հիմնականում շեշտադրում, բայց Իրանն արդեն Հայաստանին համարում է որպես իր հյուսիսարևմտյան մասի անվտանգության երաշխավորներից մեկը»,- կարծիք հայտնեց Ռոբերտ Բեգլարյանը։
Հարցազրույցն ամբողջությամբ՝ տեսանյութում։
Հռիփսիմե Հովհաննիսյան
