15.07.2026 | 23:23
Ջրափրկարարները քաղաքացիներին անվնաս մոտեցրել են ափ․ նրանց կյանքին վտանգ չի սպառնում
ՊՎԾ-ն ուսումնասիրություն է սկսել Երևանի քաղաքապետարանում
Հասարակություն
29.12.2021 | 16:54
Պետական վերահսկողական ծառայությունն այսօր առավոտից ուսումնասիրություն է իրականացրել Երևանի քաղաքապետարանում։ Այս մասին Factor.am–ի հետ զրույցում հայտնեց Քաղաքապետարանի տեղեկատվության և հասարակայնության հետ կապերի վարչության պետ Հովսեփ Կուբատյանը՝ չմանրամասնելով, թե ինչի շուրջ է կատարվում այն։
«Դեռ այս պահին ոչինչ հայտնել չեմ կարող։ Միայն նշեմ, որ ուսումնասիրությունը երկար գործընթաց է, կարող է 2-3 ամիս պահանջել»,- կարծիք հայտնեց Կուբատյանը։
Նշենք՝ դեռ ամիսներ առաջ էր հայտնի դարձել, որ ՊՎԾ-ն ստուգումներ է սկսում Երևանի քաղաքապետարանում։ Ըստ ծառայության պարզաբանման՝ մշտադիտարկումն սկսվել է դեռևս 2020 թվականի երրորդ եռամսյակում շինարարական թույլտվություններին առնչվող հարցերի կապակցությամբ.
«Կառուցապատողները մշտապես բողոքել են շինարարության թույլտվության տրամադրման ուշացումներից և ժամկետների հետ կապված թերացումներից, ինչպես նաև չհիմնավորված մերժումներից։ Մշտադիտարկումն իրականացվել է Երևանի քաղաքապետարանում, քանի որ այն շինարարության թույլտվություններ տրամադրող ամենամեծ համայնքային կառույցն է։ Մշտադիտարկումը նպատակաուղղված էր ոչ թե հենց Երևանի քաղաքապետարանում առկա անհամապատասխանությունների բացահայտմանը, այլ խնդիրը շինարարության թույլտվություններին առնչվող հարցերի բացահայտումն էր»,- նշել էր կառույցը։
Հիշեցնենք՝ նախորդ շաբաթ, երբ ավագանու «Իմ քայլը» խմբակցությունը քվեարկության էր դրել քաղաքապետին անվստահություն հայտնելու հարցը, Հայկ Մարությանն իր ելույթում նշել էր, որ տարբեր պաշտոնյաներ են իրեն դիմել անօրինական շինություններ օրինականացնելու հարցերով և մերժում ստացել։ Ըստ ամենայնի՝ ՊՎԾ այսօրվա ուսումնասիրությունը հենց այս հայտարարության հետքերով է։
Ռոզա Վարդանյան
