23.04.2026 | 15:36
Թուրքիան արգելել է 15 տարեկանից փոքր երեխաների մուտքը սոցիալական ցանցեր
Կջանամ, որ Ադրբեջանի և Թուրքիայի հանցագործությունների փաստագրման ժամանակ պահանջվող հաշվետվությունները ճշգրիտ լինեն․ ամերիկացի կոնգրեսական
Քաղաքականություն
29.12.2021 | 13:41
ԱՄՆ Ներկայացուցիչների պալատի անդամ Ֆրանկ Փալոնը հայտարարել է, որ ԱՄՆ նախագահ Ջո Բայդենի կողմից ստորագրված 2022 թվականի պաշտպանական բյուջեում կարևոր դրույթներ կան, որոնք ուղղված են Ադրբեջանին և Թուրքիային պատասխանատվության ենթարկելուն՝ Արցախում կատարած ռազմական հանցագործությունների համար։
«Ազգային պաշտպանության մասին օրենքը, որը նախագահ Բայդենը ստորագրեց երեկ, ներառում է կարևոր դրույթներ, որոնք ուղղված են Ադրբեջանին և Թուրքիային պատասխանատվության ենթարկելուն՝ Արցախում իրենց կատարած ռազմական հանցագործությունների համար։ Ես կջանամ, որպեսզի այս հանցագործությունների փաստագրման ժամանակ պահանջվող հաշվետվությունները ճշգրիտ լինեն»,- գրել է կոնգրեսականն իր Twitter-ի միկրոբլոգում։
Factor.am-ն ավելի վաղ տեղեկացրել էր, որ ԱՄՆ պաշտպանական բյուջեի ծրագրի 1302 կետը վերաբերում է Հայաստան-Ադրբեջան հակամարտությանը։
Դրանում նշվում է, որ ԱՄՆ Պաշտպանության քարտուղարությունը պետք է 44-օրյա պատերազմի վերաբերյալ հաշվետվություն ներկայացնի, որում պետք է ներկայացվեն հակամարտությանը օտարերկրյա դերակատարների ներգրավվածության վերաբերյալ տվյալներ, որոնք ներառում են ռազմական գործողությունների նկարագրությունը, ազդեցության գործողությունները, օտարերկրյա ռազմական տեխնիկայի վաճառքը և օտարերկրյա պետությունների դիվանագիտական ներգրավվածությունը հակամարտությունից առաջ, դրա ընթացքում և հետո, ինչպես նաև հակամարտության կողմերի կողմից հակամարտության ընթացքում օտարերկրյա զինյալներ վարձելու ջանքերի կամ մասնավոր ռազմական կազմակերպություններին ներգրավելու վերաբերյալ:
Տաթև Ֆռանգյան
