Քաղաքականություն
27.12.2021 | 18:45
Թուրքիան և Կատարը շարունակում են աշխատել Քաբուլի օդանավակայանի կառավարումը ստանձնելու ուղղությամբ։ Այս մասին երկուշաբթի հայտարարել է Թուրքիայի արտգործնախարար Մևլութ Չավուշօղլուն։
«Մենք շարունակում ենք համագործակցել Կատարի հետ այդ հարցում: Թուրքիան և Կատարը գտել են մասնավոր ընկերություններ, որոնք իրենց առաջարկներն են ներկայացրել թալիբներին: Թալիբները նույնպես բարձրաձայնել են իրենց առաջարկները, որոնք վերլուծության փուլում են»,- ասել է նախարարը Անկարայում կայացած մամուլի ասուլիսի ժամանակ, գրում է ՏԱՍՍ-ը։
Չավուշօղլուի խոսքով՝ եթե այդ առաջարկները «համընկնեն Թուրքիայի և Կատարի դիրքորոշմանը, ապա Անկարան և Դոհան պատրաստ են ստանձնել այդ դերը»:
«Հակառակ դեպքում՝ թալիբներն այս հարցը կքննարկեն այլ երկրների հետ»,- հավելել է նա։
Ավելի վաղ, «Թալիբան»-ի ժամանակավոր կառավարության Տրանսպորտի և քաղաքացիական ավիացիայի նախարարությունը հայտնել էր, որ մինչ այժմ «համաձայնության չի եկել որևէ ընկերության հետ՝ Քաբուլի օդանավակայանը կառավարելու համար»։
Տաթև Ֆռանգյան
