Քաղաքականություն
27.12.2021 | 14:44
Թուրքիայի նախագահի մամուլի խոսնակ Իբրահիմ Քալընը Չիկագոյում Թուրքիայի քաղաքացիների հետ հանդիպմանը հայտարարել է, որ «Ղարաբաղի ազատագրմամբ» նոր էջ է բացվել պատմության մեջ, գրում է «Անադոլու» գործակալությունը։
Քալընը ԱՄՆ-ում է՝ մասնակցելու Մահմեդականների ամերիկյան համայնքի և Հյուսիսային Ամերիկայի իսլամական համայնքի կոնգրեսին։
Չիկագոյում Թուրքիայի հյուպատոսությունում տեղի ունեցած հանդիպմանը նա, մասնավորապես, ԱՄՆ-ում հայկական լոբբիին մեղադրել է հակաթուրքական տրամադրությունների մեջ։
«Կովկասում հիմա իրականացվում է ընդհանրապես նոր գործընթաց, իսկ հիմքը, որի վրա հայկական Սփյուռքը կառուցել է իր էներգիան ու փաստարկները, կործանման եզրին է։ Այլ խոսքերով՝ Հայաստանի ու Թուրքիայի միջև հակամարտությունը կամ հայ-թուրքական հակամարտությունը մոտենում է ավարտին»,- ասել է Քալընը՝ նշելով, որ, իբր, «Ղարաբաղի ազատագրմամբ ու Ադրբեջանի կազմում նրա ինտեգրմամբ նոր էջ է բացվել պատմության մեջ»։
Քալընի խոսքով՝ ոչ մի այլ ակնկալիք չկա ոչ ոքի մոտ, Անկարան ու Երևանը փոխադարձ քայլեր են ձեռնարկում հարաբերությունների կարգավորման համար։ Նա նաև ասել է, որ դրանից ամենամեծ օգուտը ստանալու է Հայաստանը։
«Թուրքիայի հետ հարաբերությունների կարգավորումը Հայաստանին, որը ելք չունի դեպի ծով, տնտեսապես թույլ է և գտնվում է Ռուսաստանի հովանու տակ, մեծ ներդրում կբերի ինչպես քաղաքական, այնպես էլ տնտեսական առումով»,- ասել է Թուրքիայի նախագահի մամուլի խոսնակը։
Էմմա Չոբանյան
