Քաղաքականություն
24.12.2021 | 21:172016թ. ԼՂ բանակցային պրոցեսում տեղի է ունեցել աղետ։ Այսօր առցանց ասուլիսում հայտարարեց ՀՀ վարչապետ Նիկոլ Փաշինյանը։
«2016թ. ԵԱՀԿ ՄԽ համանախագահների կողմից ներկայացվել է առաջարկությունների 3 փաթեթ, որտեղ 2011թ–ից ի վեր առաջին անգամ չի ներառվել նախադասություն այն մասին, որ ԼՂ-ն ստանում է միջանկյալ կարգավիճակ, որը հայկական կողմից լայնորեն քարոզվում ու գովազդվում է։ Բայց աղետը սա չէ։ Այդ բանակցային փաթեթում նշվում է, որ ԼՂ-ն ունի ԱԺ, ունի դատական իշխանություն և այլն, բայց ոչ ոք չի ասում, որ ԼՂ այդ ժամանակավոր իրավիճակն ու կարգավիճակը ճշգրտելու հարցը, ըստ այդ բանակցային բովանդակության, տեղափոխվել է ՄԱԿ-ի անվտանգության խորհուրդ, և ասվել է, որ ՄԱԿ–ի ԱԽ–ն, խորհրդակցելով Հայաստանի հետ, խորհրդակցելով Ադրբեջանի հետ, խորհրդակցելով ԵԱՀԿ ՄԽ համանախագահների հետ, որոշում է կայացնում այդ իրավական համակարգերի իրավական ու պրակտիկ կիրառման նրբությունների վերաբերյալ»,- նշեց վարչապետը։
Նրա մեկնաբանմամբ` այսկերպ ԼՂ հարցի լուծումը, որ բանակցային ամբողջ պրոցեսում գտնվել է ԵԱՀԿ ՄԽ համանախագահների տիրույթում, այս կետով տեղափոխվում է ՄԱԿ–ի ԱԽ։ Իսկ ՄԱԿ–ի ԱԽ տիրույթում ԼՂ–ի` որ երկրի տարածքում գտնվելու հարցի որոշումը, ըստ Փաշինյանի, դառնում է շատ կանխատեսելի։ «1993թ. ՄԱԿ-ի ԱԽ-ն ընդունել է մի բանաձև, որտեղ ասվում է` Ադրբեջանի ԼՂ–ի տարածաշրջան։ Ասել է, որ ճանաչում է Ադրբեջանի տարածքային ամբողջականությունն ու անքակտելիությունը։ Այս աղետն է տեղի ունեցել 2016թ. ԼՂ բանակցային պրոցեսում»,- ասաց վարչապետը։
Նա նաև հիշեցրեց, որ 2017թ. ՀՀ երրորդ նախագահ Սերժ Սարգսյանն էլ հայտարարել էր, որ բանակցային պրոցեսը կանգնած է, քանի որ Ադրբեջանի ակնկալիքներն անընդունելի են ՀՀ–ի համար։
