Նախկին ոստիկանապետ Հայկ Հարությունյանին ինքնասպանության հասցնելու քրգործի վարույթը կասեցվել է

ՀՀ նախկին ոստիկանապետ Հայկ Հարությունյանին ինքնասպանության հասցնելու քրեական գործի վարույթը դեռևս մայիսի 25-ին կասեցվել է, սակայն այս մասին որևէ պաշտոնական հաղորդագրություն չէր տարածվել։ Ինչպես Factor.am-ի հետ զրույցում տեղեկացրեց Քննչական կոմիտեի մամուլի խոսնակ Վարդան Թադևոսյանը՝ վարույթը կասեցվել է Քրեական դատավարության օրենսգրքի 31-րդ հոդվածի 1-ին մասի 1-ին կետի հիմքով (հայտնի չէ անձը, որը գործով պետք է ներգրավվի որպես մեղադրյալ).

«Այս պահին դեռևս շարունակվում է դատաձգաբանական փորձաքննությունը։ Չեմ բացառում, որ արդյունքները ստանալուց հետո քեական գործը կրկին վերաբացվի»,- նշեց Թադևոսյանը։

Հիշեցնենք՝ 2003-2008 թվականներին Հայաստանի ոստիկանության պետի պաշտոնը զբաղեցրած 63-ամյա Հայկ Հարությունյանի դին՝ գլխի շրջանում հրազենային վնասվածքով, հայտնաբերվել էր 2019 թվականի սեպտեմբերի 23-ին։ Ըստ ՔԿ հաղորդագրության՝ քննությամբ տվյալներ էին ձեռք բերվել այն մասին, որ գեներալ-գնդապետը դեպքին նախորդող ժամանակահատվածում օգտագործել է զգալի քանակությամբ ալկոհոլ: Հարցաքննվել էին վկաներ, այդ թվում և Հայկ Հարությունյանի հետ նույն առանձնատանը գտնված անձը։ Թե ինչ մանրամասներ է հայտնել վկան, մինչ օրս չի հրապարակվում։

Նախկին ոստիկանապետ Հայկ Հարությունյանի մահվան առթիվ քրեական գործ էր հարուցվել Քրեական օրենսգրքի 110-րդ հոդվածի 1-ին մասի հատկանիշներով` սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը:

Հավելենք նաև, որ Հարությունյանը Մարտի 1-ի գործով անցնում էր վկայի կարգավիճակով:

Ռոզա Վարդանյան