Երբ տեղի կունենա հայ և թուրք բանագնացների հանդիպումը. փորձագետներն ուժերն անհամաչափ են գնահատում․ ՏԵՍԱՆՅՈՒԹ

Թուրքիայի և Հայաստանի հատուկ բանագնացները կհանդիպեն մոտ ապագայում, այսօր հայտարարել է Թուրքիայի արտգործնախարար Մևլութ Չավուշօղլուն, սակայն թուրքական դիվանագիտության ղեկավարը չի նշել առաջիկա հանդիպման վայրն ու հստակ ժամկետը։ Հիշեցնենք՝ Անկարան և Երևանը հարաբերությունների կարգավորման շրջանակում հատուկ բանագնացներ նշանակելու մասին հայտարարեցին նախորդ շաբաթվա սկզբին: Արդեն շաբաթվա վերջին հայտնի դարձավ, որ Թուրքիայում Հայաստանի բանագնացը իշխող «Քաղաքացիական պայմանագիր» կուսակցության վարչության անդամ, ԱԺ փոխնախագահ Ռուբեն Ռուբինյանն է:

31-ամյա Ռուբինյանը հայ-թուրքական կնճռոտ հարցերի շուրջ բանակցելու է 37 տարվա դիվանագիտական աշխատանքի փորձ ունեցող Սերդար Քըլըչի հետ: Նա, հիշեցնենք, 2014-2021 թվականներին եղել է ԱՄՆ-ում Թուրքիայի դեսպանը, իսկ մինչ այդ՝ Թուրքիայի դեսպանը Ճապունայում, 2010-12 թվականներին էլ՝ Թուրքիայի ԱԽ գլխավոր քարտուղարը:

Հայկական կողմի բանագնացի ընտրությունը միանշանակ չընդունվեց ինչպես ընդդիմադիր ուժերի, այնպես էլ Փաշինյանի կառավարության նկատմամբ լոյալ վերաբերմունք ունեցող որոշ փորձագետների կողմից։

Նիկոլ Փաշինյանը Ռուբեն Ռուբինյանին Թուրքիայում բանագնաց նշանակելով՝ գնացել է քաղաքական թիմից ներկայացուցիչ ընտրելու ճանապարհով, նշում է քաղաքագետ Ստյոպա Սաֆարյանը և շեշտում, որ այս որշումը կարող է ընկալելի համարվել այն կոնտեքստում, որ իշխող թիմին վստահելի անձնավորություն է անհրաժեշտ եղել:

Հիշեցնենք՝ Նիկոլ Փաշինյանը դեռ 2018 թվականին էր հայտարարել՝ դիվանագիտական փորձ չունեցնողներն այլևս դիվանագիտական պաշտոններում չեն նշանակվելու: Դրանից հետո, սակայն, հասարակությունն ականատես եղավ, թե դիվանագիտական փորձ չունեցող իմքայլական նախկին պատգամավորներն ինչպես նշանակվեցին դեսպաններ: Խոսքը, մասնավորապես, Սոս Ավետիսյանի՝ Իսպանիայում և Վիկտոր Ենգիբարյանի՝ Գերմանիայում դեսպաններ նշանակվելու մասին է: Այժմ էլ փորձագիտական շրջանակների կողմից արձանագրվում է, որ մեկ այլ կարևոր պաշտոնում նշանակվում է դիվանագիտական բավարար փորձ չունեցող Ռուբեն Ռուբինյանը:

Ինքը՝ Ռուբեն Ռուբինյանն այսօր հրաժարվեց այս թեմայով մեր հարցերին պատասխանել: Իսկ ահա իշխող ՔՊ խմբակցության պատգամավոր Մարիա Կարապետյանը քննադատությունները տեղին չի համարում, ասում է՝ Ռուբինյանը զբաղվում է արտաքին քաղաքականության համակարգմամբ:

«Հայաստան» խմբակցությունից Գեղամ Մանուկյանը հարցնում է՝ Հայաստանի բանագնացը դիվանագիտական ի՞նչ կարողություններ ունի՝ տարիներ շարունակ Հայոց ցեղասպանության փաստը ժխտող Սերդար Քըլըչի հետ քննարկումներ իրականացնելու համար:

Ընդդիմությունը դժգոհում է, որ տեղեկություններ չունի հայ-թուրքական օրակարգի մասին, ինչի շուրջ են առաջիկայում զրուցելու Ռուբինյանն ու Քըլըչը: Գեղամ Մանուկյանն այս համատեքստում նշում է՝ այս անտեղյակության ֆոնին ընդդիմությունն ինչո՞վ օգնի իշխանությանը Թուրքիայի հետ հարաբերություններ հաստատելու հարցում:

Թուրքիայի ցանկությունները միանգամայն պարզ են, նշում է Ստյոպա Սաֆարյանը և հավելում, որ Անկարան այս հանդիպումների ընթացքում առաջ է քաշելու Արցախից հրաժարվելու և, այսպես կոչված, «Զանգեզուրի միջանցքի» հարցերը:

Թե երբ և ինչ օրակարգով տեղի կունենա Ռուբինյան-Քըլըչ հանդիպումը, հայտնի չէ: Պաշտոնական Երևանը ոչինչ չի հայտնում, հայ հանրությունը հանդիպման մասին նույնպես թուրք նախարարի հայտարարությունից է տեղեկացել: Ուշագրավ է, որ այս թեմայով բոլոր նորություններն առաջինը հայտնում է թուրքական կողմը:

Մանրամասները՝ տեսանյութում։

Նարեկ Կիրակոսյան