18.12.2025 | 20:03
Միրզոյանը և Մանտաս Ադոմենասը քննարկել են ժողովրդավարական ինստիտուտների զարգացման հարցեր
Գագիկ Բեգլարյանը և նրա ընտանիքն անցնում են ապօրինի ծագում ունեցող գույքի բռնագանձման գործով
Հասարակություն
20.12.2021 | 14:05
ՀՀ տրանսպորտի և կապի նախկին նախարար, Երևանի նախկին քաղաքապետ Գագիկ Բեգլարյանը և նրա ընտանիքն անցնում են ապօրինի ծագում ունեցող գույքի բռնագանձման գործով։ Ինչպես Factor.am-ի հետ զրույցում հաստատեցին Գլխավոր դատախազությունից՝ Բեգլարյանն ու նրա ընտանիքին արդեն իսկ ծանուցվել են դեկտեմբերի 27-ին Դատախազություն ներկայանալու և ուսումնասիրման նյութերին ծանոթանալու համար։
Ինչպես տեղեկանում ենք «Ազդարար» տեղեկատվական հարթակից՝ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Գագիկ Բեգլարյանին, նրա կնոջը՝ Նունե Նիկոյանին, երեխաներին՝ Նատելլա և Հրանտ Բեգլարյաններին պատկանող գույքի առնչությամբ իրականացվել է ուսումնասիրություն, որի արդյունքում կազմվել է ամփոփագիր, ինչի հիման վրա նրանց անվամբ հաշվառված գույքը հանդիսանում է բռնագանձման առարկա:
Ծանուցումը ստանալուն պես՝ մեկամսյա ժամկետում, նրանք պետք է ներկայանան ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն, ծանոթանան գործի նյութերին և դրա վերաբերյալ դիրքորոշում ներկայացնեն:
Հիշեցնենք՝ դեռևս 2020-ի մարտին Ազգային անվտանգության ծառայությունը հետախուզում էր հայտարարել՝ Բեգլարյանին մեղադրելով պետությանը պատկանող առանձնապես խոշոր չափերով՝ ավելի քան 230 միլիոն դրամ արժողությամբ անշարժ գույք հափշտակելու համար։ Խոսքը մայրաքաղաքի Կասկադի տարածքում գործող մանկապարտեզի օտարման մասին է։
Ըստ քրեական գործի, 13 տարի առաջ՝ 2008-ին մայրաքաղաքի Կենտրոնի թաղապետի պաշտոնը զբաղեցնելու ժամանակ Բեգլարյանը երկու մանկապարտեզներ վերամիավորելու գործընթաց է սկսել։ Ապա 2009-ին, արդեն որպես Երևանի քաղաքապետ, մի որոշում է կայացրել, որով միավորված մանկապարտեզի ավելի քան 200 քառակուսի մետր մակերեսով տարածքը դարձել է հասարակական սպասարկման տարածք։ Դրանից հետո այդ անշարժ գույքը ընդամենը ավելի քան 23 միլիոն դրամով օտարվել է, իսկ 2011թ. փետրվարին 24 միլիոն դրամով գրանցվել է Բեգլարյանի հոր անվամբ, այնուհետև որպես ժառանգորդ այն գրանցվել է Գագիկ Բեգլարյանի անվամբ։ Ստացվում է՝ համայնքային գույքը օտարվել է իրական արժեքից 10 անգամ պակաս գնով
Բեգլարյանը Հայաստան է վերադարձել մայիսի 17-ին և կալանավորվել հենց օդանավակայում, սակայն անազատության մեջ անցկացրել ընդամենը մեկ օր։ Հաջորդ օրը նրա խափանման միջոց կալանքը փոխարինվել է 50 միլիոն ՀՀ դրամ գրավով։
Ռոզա Վարդանյան
