Քաղաքականություն
20.12.2021 | 13:01
Ախուրյան խոշորացված համայնքում գումարվել է ավագանու անդրանիկ նիստը. այս պահին համայնքապետ են ընտրում։ Թեկնածուները երկուսն են` «Ախուրյան» կուսակցությունների դաշինքի ցուցակը գլխավորող Ախուրյան խոշորացված համայնքի ղեկավար, դաշնակցական Արծրուն Իգիթյանը և ՔՊ֊ի թեկնածու Ալբերտ Այվազյանը` Առափի համայնքի ղեկավարը։
Հիշեցնենք, որ «Ախուրյան» և «Հաղթանակ» դաշինքները, որոնք երկուսն էլ գլխավորում են ՀՅԴ ներկայացուցիչներ, հուշագիր են ստորագրել` միասին ստանձնելու Ախուրյանի տեղական ինքնակառավարումը։ Նրանք համատեղ ունեն 14 մանդատ, իսկ ՔՊ-ն, որը ձայների քանակով առաջատարն է, ունի 13 մանդատ։ Միավորված ընդդիմադիր դաշինքների ներկայացուցիչները մտավախություն ունեն, որ ՔՊ-ն մի ձայն կխլի իրենցից` վերցնելով իշխանությունը։ ՀՅԴ-ն նույնիսկ հայտարարություն էր տարածել` նշելով, որ ՔՊ-ն հնարավոր ու անհնար ամեն մեթոդ օգտագործում է իշխանությունն Ախուրյանում վերցնելու համար։
Ավագանու նիստին մասնակցում են նաև Ազգային Ժողովի ՀՅԴ-ական պատգամավոր Արթուր Խաչատրյանը, ԲՀԿ-ական նախկին պատգամավոր Միքայել Մելքումյանը։ Արթուր Խաչատրյանի մասնակցությունն ակնհայտորեն դուր չեկավ ՔՊ֊ականներին, ավագանու անդամներից մեկը հետաքրքրվեց` ո՞ր իրավունքով է մասնակցում, որին ի պատասխան` Արթուր Խաչատրյանը մեկաբանեց պատգամավորի լիազորությունները։
Նշենք, որ թե’ Ախուրյանի համայնքապետարանի շենքի ներսում, և թե’ բակում մեծ թվով ոստիկաններ են հսկողություն իրականացնում։ Հաշվիչ հանձնաժողովն արդեն ձևավորվել է, քիչ հետո տեղի կունենա քվեարկությունը։
Արմիկ Մովսիսյան
