Ջեյք Սալիվանը հայ-ադրբեջանական սահմանի մոտ ռազմական տեղաշարժերն անվանել է սադրիչ

ԱՄՆ նախագահ Ջո Բայդենի ազգային անվտանգության հարցերով խորհրդական Ջեյք Սալիվանի մամուլի խոսնակ Էմիլի Հորնը մանրամասներ է հայտնել Սալիվանի և ՀՀ Ազգային անվտանգության խորհրդի քարտուղար Արմեն Գրիգորյանի հանդիպումից։ Այս մասին տեղեկանում ենք Սպիտակ տան պաշտոնական կայքից։

«Պարոն Սալիվանը փոխանցել է ԱՄՆ-ի հանձնառությունը՝ Հայաստանում և Հարավային Կովկասի տարածաշրջանում խաղաղության, անվտանգության ու բարգավաճման համար։ Նա իր մտահոգությունն է հայտնել Հայաստանի ու Ադրբեջանի միջև շարունակվող լարվածության կապակցությամբ ու նշել, որ չդեմարկացված սահմանների մոտ ռազմական տեղաշարժերն անպատասխանատու են ու սադրիչ։ Նա ողջունել է շարունակական շփումը երկու կողմերի միջև և ընդգծել ԱՄՆ-ի պատրաստակամությունը՝ շարունակել աջակցել վստահության ամրապնդման միջոցառումներին և տարածաշրջանային հաշտեցմանը՝ ինչպես երկկողմ, այնպես էլ ԵԱՀԿ Մինսկի խմբի համանախագահի մակարդակով»,- ասվում է հայտարարության մեջ։

Բացի այդ, նշվում է, որ Սալիվանը ողջունել է Թուրքիայի և Հայաստանի հատուկ ներկայացուցիչների նշանակման հայտարարությունը՝ հարաբերությունների կարգավորումը քննարկելու համար։

«Պարոն Սալիվանը նաև բարձր է գնահատել ՀՀ վարչապետ Նիկոլ Փաշինյանի մասնակցությունը «Հանուն ժողովրդավարության» գագաթնաժողովին ու ընդգծել մեր ամուր համագործակցությունը Հայաստանում բարեփոխումների, ժողովրդավարական ինստիտուտների կառուցման և տնտեսական զարգացման ուղղությամբ»,- ասվում է տարածված հայտարարության մեջ։

Էմմա Չոբանյան