16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Եթե նույնիսկ 3 մլն բնակչությունն էլ կողմ լինի, ոչ ոք իրավունք չունի հող զիջելու. Մխիթար Զաքարյան․ ՏԵՍԱՆՅՈՒԹ
Քաղաքականություն
15.12.2021 | 15:09
«Եթե նույնիսկ 3 մլն բնակչությունն էլ կողմ լինի, ոչ ոք բարոյական իրավունք չունի հող զիջելու»,- ԱԺ-ում լրագրողների հետ զրույցում ասաց «Հայաստան» դաշինքի պատգամավոր, Մեղրիի նախկին համայնքապետ Մխիթար Զաքարյանը՝ անդրադառնալով դիտարկմանը, որ տեղեկություն է շրջանառվում այն մասին, որ Ոսկեպար տանող մայրուղու 3 հատված հայտնվելու է ադրբեջանական սահմանին և այլընտրանքային ճանապարհներ են կառուցվելու:
«Մեր պատմական հողը մեր նախնիներից է մնացել և հույս ունենք, որ մեր սերունդները պետք է վայելեն»,- ընդգծեց Զաքարյանը:
«Կուզեի ուշադրություն հրավիրել մի հանգամանքի վրա, որ բոլորն անընդհատ ասում են՝ գյուղացիներին զինաթափել են, ուժեղ կռվողներին իջեցրել են։ Այո, դրանք կարևոր բաներ են՝ համայնքի ղեկավարը պետք է զինապարտ լինի, ռազմական գործից հասկանա, գյուղացիները պետք է զինված լինեն, բայց կխնդրեի հարցադրումների ուղղությունը փոխել»,- նշեց Զաքարյանը՝ անդրադառնալով դիտարկմանը, որ սյունեցիները կարծեք թե համակերպվել են Գորիս-Կապան միջպետական ճանապարհի՝ ադրբեջանցիների կողմից զավթված լինելու փաստի հետ, քանի որ չընդվզեցին իշխանության դեմ:
«Մեր դիմաց ադրբեջանական բանակն է։ Խոստովանենք, որ Ադրբեջանը ստեղծել է կազմակերպված պետություն, արդյունավետ աշխատող պետական համակարգ և ուժեղ բանակ։ Սա ցավով և նախանձով եմ ասում։ Եթե նման բանակի հետ հարաբերվելիս մենք մեր հարցադրումներով և մենք բոլորս հույսներս դնում ենք գյուղացիների զինվածության և համայնքապետերի վրա ու այդ հարթությունում պատասխան ակնկալում, ապա արդեն իսկ պարտված ենք համակարգային հարթության վրա։ Ասելիքս կուտակվել է այս առումով։ Այդ ամբողջին պետք է դիմակայեն ՊՆ-ն, ԱԱԾ սահմանապահ ծառայությունը, պատգամավորները, բնակչությունը՝ բոլորը։ Բոլորն իրենց գործունեությամբ պետք է հասնեն դրան, այդ մոդելին։ Միայն այդ ժամանակ հնարավորություն կլինի արժանապատիվ դիմակայել»։
Մխիթար Զաքարյանը շեշտեց․ «Մենք ուժեղ բանակ պետք է ունենանք։ Անցած մեկ տարին զինված ուժերի առումով կորցրած եմ համարում»։
Պատգամավորը նաև նշեց՝ համաձայն չէ իշխանությունների բնորոշումների հետ, թե Գորիս-Կապան ավտոճանապարհի 21 կմ-ոց հատվածն Ադրբեջանի տարածքում է․ «Դրանք հայկական տարածքներ են։ Ինչ Էյվազլի: Դա Որոտան գյուղն է։ Հուսամ՝ կապրենք այնքան, որ իրավաբանորեն էլ ապացուցենք դրանց հայկական լինելը»։
