Հայտարարությունները, թե ՍԴ-ն հերքեց Դատախազության մոտեցումը՝ ճիշտ չեն․ Գևորգ Բաղդասարյան

Մենք համաձայն չենք, որովհետև տեսնում ենք սահմանադրի կամքի փոփոխման, անկանխատեսելի իրավամեկնաբանության վտանգ։ Այս մասին լրագրողների հետ զրույցում ասաց ՀՀ գլխավոր դատախազի տեղակալ Գևորգ Բաղդասարյանը՝ անդրադառնալով ՍԴ որոշմանը, որով արձանագրվել է, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից չի կարող պահվել անազատության մեջ։

Դիտարկմանը, որ ՍԴ որոշումը խոսում է այն մասին, որ դատախազությունը մտել է քաղաքական դաշտ, խաղը քաղաքական է, ոչ թե՝ իրավական, Բաղդասարյանն արձագանքեց․ «Քաղաքական չէ և, եթե որևէ մեկը տրամադրված է ինչ-որ պնդում անելու, այդ ամենում ինչ-որ բան տեսնելու՝ ինքը տեսնում է։ Դեպքեր կան, որ անձին կարող են նույնիսկ թմրամիջոց պահելու համար ձերբակալեն, ինքը հայտարարությամբ հանդես գա, որ իր նկատմամբ քաղաքական հետապնդում է իրականացվում, քանի որ ինքը հարում է որևէ քաղաքական ուժի»։

Բաղդասարյանը հիշեցրեց, որ նախկինում՝ Արմեն Գևորգյանի մասով պնդել են, որ քրեական հետապնդում շարունակելու համար ԱԺ համաձայնությունը պետք չէ և ՍԴ-ն համաձայնել է այդ պնդման հետ։

«Հետևաբար՝ հայտարարությունները, թե ՍԴ-ն հերքեց դատախազության մոտեցումը՝ ճիշտ չէ։ Դատախազությունը գտնում էր, որ նույնը վերաբերում է նաև կալանավորմանը, որովհետև Սահմանադրության մեջ քրեական հետապնդում հարուցելու և ազատությունից զրկելու իրավիճակները միատեսակ կարգավորման են ենթարկված»,- ասաց Բաղդասարյանը։

Ռոզա Վարդանյան