05.08.2026 | 21:40
Երևանում և 3 մարզի մի շարք հասցեներում գազանջատումներ կլինեն
Դանակահարության դեպքի առթիվ հարուցվել է քրեական գործ․ ՔԿ
Հասարակություն
13.12.2021 | 18:01
ՀՀ քննչական կոմիտեի Արարատի մարզային քննչական վարչության Վեդիի քննչական բաժնում քննություն է տարվում՝ Վանաշեն գյուղի բնակչի դանակահարության բոլոր հանգամանքները պարզելու ուղղությամբ․ տեղեկացնում են ՀՀ ՔԿ-ից։
Ըստ նախնական տվյալների 2021թ. դեկտեմբերի 9-ին՝ ժամը 13:00-ին, «Վեդու բժշկական կենտրոն»-ից հաղորդում է ստացվել այն մասին, որ «Կրծքավանդակի հետին մակերեսի ծակած-կտրած վերքեր, երկրորդ աստիճանի հեմոպնևմոթոքսային հեմոռագիկ շոկ» ախտորոշմամբ իրենց մոտ բուժօգնության է տեղափոխվել Արարատի մարզի Վանաշեն գյուղի 53-ամյա բնակիչ:
Դեպքի առթիվ նյութերի նախապատրաստման ընթացքում իրականացված անհետաձգելի միջոցառումների արդյունքում պարզվել են տղամարդու՝ հիշյալ մարմնական վնասվածքներն ստանալու մի շարք հանգամանքներ, այդ թվում՝ դեպքի վայրը, շարժառիթը, առերևույթ հանցագործություն կատարած անձի ինքնությունը:
Տվյալներ են ձեռք բերվել այն մասին, որ տղամարդը մարմնական վնասվածքներն ստացել է իր հետ նույն հաստատությունում աշխատող, Վեդի քաղաքի 33-ամյա բնակչի հետ տեղի ունեցած վիճաբանության ժամանակ, որի ընթացքում վերջինս բռունցքով հարվածներ է հասցրել 53-ամյա տղամարդու մարմնի տարբեր մասերին, այնուհետև դանակով՝ կրծքավանդակի հետին մակերեսին:
2021թ. դեկտեմբերի 11-ին առերևույթ հանցագործություն կատարած 33-ամյա տղամարդն ինքնակամ ներկայացել է ոստիկանության Արարատի բաժին, տվել ինքնախոստովանական բացատրություն, իսկ վերջինիս անձնական խուզարկությամբ հայտնաբերվել և վերցվել է հանցագործության գործիք հանդիսացող դանակը:
Նրա մասնակցությամբ կատարվել է դեպքի վայրի զննություն, որի ընթացքում նա ներկայացրել է դեպքի մանրամասները՝ նշելով նաև վիճաբանության պատճառը:
Նյութերի նախապատրաստման ընթացքում նշանակվել են մի շարք փորձաքննություններ, առգրավվել են տուժողի հագին՝ դեպքի պահին եղած հագուստները, բացատրություններ են վերցվել մի շարք անձանցից:
Դեպքի առթիվ ՀՀ ոստիկանության Արարատի բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով, որը նախաքննություն կատարելու համար ուղարկվել է ՀՀ քննչական կոմիտեի Արարատի մարզային քննչական վարչության Վեդիի քննչական բաժին և ընդունվել վարույթ:
Կատարվում է նախաքննություն:
