05.06.2026 | 18:09
Լուիս դե լա Ֆուենտե․ «Հաճելիորեն զարմացած էի Իրաքի հավաքականի խաղով»
Կալանավորվեց գերությունից վերադարձած ևս մեկ զինծառայող
Հասարակություն
11.12.2021 | 15:00
Քիչ առաջ դատարանը բավարարել է նաև գերությունից դեկտեմբերի 4-ին վերադարձած Արտյոմ Մանասյանին կալանավորելու Քննչական կոմիտեի միջնորդությունը: Տեղեկությունը Factor.am-ի հարցին ի պատասխան հայտնեց նրա պաշտպան Ալեքսան Թումասյանը:
Պայմանագրային զինծառայող Արտյոմ Մանասյանը կալանավորվել է մեկ ամիս ժամկետով:
Հիշեցնենք՝ ՔԿ-ն մեկ շաբաթ առաջ Հայաստան վերադարձած 10 գերիներից 5-ին մեղադրանք է առաջադրել Քրեական օրենսգրքի 365 հոդվածի 3-րդ մասով՝ մարտական հերթապահություն կամ մարտական ծառայություն կրելու կանոնները խախտելը, որն առաջացրել է ծանր հետևանքներ։
Քննչական կոմիտեն միջնորդություն է ներկայացրել նրանց կալանավորելու համար։
Երեկ Factor.am-ն արդեն տեղեկացրել էր, որ կալանավորվել են լեյտենանտ Սերժիկ Ամիրխանյանը և պայմանագրային զինծառայող Ռոբերտ Նազարյանը: Դատարանը մերժել է նախկին գերիներից կոչումով մայոր, գումարտակի հրամանատարի տեղակալ Նարեկ Երիմյանին կալանավորելու միջնորդությունը։
Հիշեցնենք՝ այս զինծառայողները գերեվարվել էին այս տարվա նոյեմբերի 16-ին՝ Սյունիքի և Վայոց ձորի սահմանագոտում ծավալված արյունալի մարտերի օրը։ Այդ օրը հայկական կողմը երկու դիրք էր կորցրել։
Նարեկ Կիրակոսյան
