07.10.2026 | 23:48
Արթուր Դանիելյանը կալանավորվեց
Արմեն Բիլյանի դատավճիռը բեկանվեց. նա դատապարտվեց 25 տարի ազատազրկման․ ՏԵՍԱՆՅՈՒԹ
Հասարակություն
10.12.2021 | 12:54
«Սասնա Ծռեր 1» քրեական գործով ամբաստանյալ Արմեն Բիլյանը մեղավոր ճանաչվեց՝ ոստիկան Գագիկ Մկրտչյանի սպանության համար և դատապարտվեց ազատազրկման՝ 25 տարի ժամկետով։
Վերաքննիչ քրեական դատարանը՝ դատավոր Տիգրան Սահակյանի նախագահությամբ, կազմով՝ դատավորներ Արմեն Բեկթաշյանի և Ռուբիկ Մխիթարյանի, մասամբ բավարարեց դատախազության բողոքը և պատժաչափի խստացում կիրառեց միայն Արմեն Բիլյանի մասով՝ 4 տարի 11 ամիս ազատազրկումը փոխարինվեց 25 տարի ազատազրկմամբ։ Մինչև դատավճիռը օրինական ուժի մեջ մտնելը՝ Արմեն Բիլյանի նկատմամբ որպես խափանման միջոց ընտրվեց կալանավորումը, վերջինս կալանավորվեց հենց դատական նիստերի դահլիճում։
Մյուս ամբաստանյալների մասով դատավճիռը մնաց անփոփոխ։ Վերաքննիչ դատարանը մերժեց դատավճռի դեմ պաշտպանների բողոքը։
Հիշեցնենք, որ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, փետրվարի 24-ին հրապարակել էր «Սասնա ծռեր» գործով դատավճիռը, համաձայն որի՝ Արայիկ Խանդոյանի նկատմամբ քրեական հետապնդումը դադարեցվել է՝ մահվան հիմքով, Պավել Մանուկյանը մեղավոր է ճանաչվել՝ դատապարտվելով ազատազրկման՝ 7 տարի 8 ամիս ժամկետով, Վարուժան Ավետիսյանը՝ 7 տարի 4 ամիս, Մխիթար Ավետիսյանը 7 տարի 6 ամիս, Էդվարդ Գրիգորյանը՝ 6 տարի 6 ամիս, Գագիկ Եղիազարյանը՝ 7 տարի 5 ամիս, Արեգ Կյուրեղյանը՝ 7 տարի 1 ամիս, Սեդրակ Նազարյանը՝ 8 տարի 2 ամիս ժամկետով։
Նշենք, որ երկու ոստիկանի՝ Յուրի Տեփանոսյանի և Արթուր Վանոյանի սպանության մեջ մեղադրվող Սմբատ Բարսեղյանը, որի համար դատախազը պահանջել էր ցմահ ազատազրկում, դատապարտվել է ազատազրկման՝ 25 տարի ժամկետով, իսկ Արմեն Բիլյանը, որին մեղսագրվում էր ոստիկանության ծառայող Գագիկ Մկրտչյանի սպանությունը, Երևանի ընդհանուր իրավասության դատարանի կողմից արդարացվել էր ու ճանաչվել անպարտ։
Բիլյանը մեղավոր է ճանաչվել ՀՀ ՔՕ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 177-րդ հոդվածի 3-րդ մասի 1-ին և 2-րդ կետերով նախատեսված հանցագործությունների կատարման մեջ՝ կազմակերպված խմբի կողմից զենք-զինամթերք պահելու, կրելու, պատանդ վերցնելու, հրազեն հափշտակելու, շորթելու և առանձնապես խոշոր չափերով գողություն կատարելու համար։ Նա դատապարտվել էր ազատազրկման՝ 4 տարի 11 ամիս ժամկետով ու ազատ արձակվել նիստերի դահլիճից՝ մինչև դատավճռի օրինական ուժի մեջ մտնելը նրա նկատմամբ որպես խափանման միջոց կիրառվել էր չհեռանալու մասին ստորագրությունը։
Ռոզա Վարդանյան
Մանրամասները՝ տեսանյութում:
