Բանավոր քննություններ չեն լինի․ արդյունավետ ռեֆորմ, թե՞ զարկ դիմորդների «թեստամտածողությանը»․ ՏԵՍԱՆՅՈւԹ

Կառավարությունը հաստատել է բուհերի բակալավրի ու անընդհատ և ինտեգրված կրթական ծրագրերով 2022-2023 ուսումնական տարվա մասնագիտությունների և ընդունելության քննությունների ցանկը: Բուհ ընդունվելու համար դիմորդներն այսուհետ կհանձնեն երկու միասնական քննություն, իսկ բանավոր քննությունները հանվել են:

ԵՊՀ ընդունող հանձնաժողովի քարտուղար, ուսումնական գործընթացի վերահսկման բաժնի վարիչ Արմեն Սարգսյանը շեշտում է՝ դա արվել է, որպեսզի ընդունելության քննություններում բացառվի սուբյեկտիվ գործոնը, իսկ դիմորդը հնարավորինս զերծ մնա լարված իրավիճակներից:

Նա հիշեցնում է այն խնդիրները, որոնք պետք է հաղթահարեր բանավոր քննություն հանձնող դիմորդը: Օրինակ՝ եթե նախկինում ԵՊՀ Հայ բանասիրության, Ռուս բանասիրության, Ժուռնալիստիկայի, Եվրոպական լեզուների և հաղորդակցության ֆակուլտետներ ընդունվելու համար անհրաժեշտ էր հանձնել բանավոր քննություն, ապա այժմ դիմորդները հանձնելու են միայն գրավոր միասնական քննություններ, որոնք կազմակերպելու է Գնահատման և թեստավորման կենտրոնը:

Կրթության փորձագետ, մանկավարժ Արսեն Վարդանյանի խոսքով՝ այս փոփոխությունները դիմորդների համար առաջին հայացքից կարող են գրավիչ թվալ, սակայն հետագայում նրանք բախվելու են մի շարք խնդիրների: Նա ընդգծում է` բանավոր քննությունները հանելը կհարվածի գրականություն առարկայի՝ դիմորդների իմացության մակարդակին: Ըստ փորձագետի՝ այն, որ բուհը չորս տարվա ընթացքում կկարողանա ուսանողների մոտ բանավոր խոսքը հասցնել անհրաժեշտ մակարդակի, չարդարացված հույս է:

Երևանի թիվ 198 ավագ դպրոցի անգլերենի ուսուցչուհի Մարինա Ստեփանյանի խոսքով՝ թվում է, թե լավ է, որ դիմորդը մեկ առարկա քիչ կպարապի, գուցե այս փոփոխությունը նաև կազատի ծնողներին ֆինանսական որոշակի բեռից, սակայն հետևանքներն անդառնալի կարող են լինել:

Գործընկերոջ մոտեցումների հետ համաձայն է նաև հայոց լեզվի ուսուցչուհի Նարինե Գալստյանը:

ԵՊՀ ընդունող հանձնաժողովի քարտուղար Արմեն Սարգսյանը որպես փաստարկ մատնանշում է մայրաքաղաքաբնակ և մարզաբնակ դիմորդների միջև հավասար հնարավորությունների ապահովումը, որը, ըստ նրա, ապահովվում է այս փոփոխություններով: Նրա խոսքով՝ երևանաբնակ դիմորդները հաճախ պարապում են լավագույն մասնագետների մոտ, իսկ մարզերի բնակիչներն այդ հնարավորությունը չունեն: Հայ բանասիրության և Ժուռնալիստիկայի ֆակուլտետներ ընդունվելու համար դիմորդները հանձնելու են «Հայոց լեզու և հայ գրականություն» և «Օտար լեզու» միասնական քննություններ, Ռուս բանասիրության ֆակուլտետ ընդունվելու համար՝ «Հայոց լեզու և հայ գրականություն» և «Ռուսաց լեզու», իսկ Եվրոպական լեզուների և հաղորդակցության ֆակուլտետ ընդունվելու համար՝ «Հայոց լեզու և հայ գրականություն» և համապատասխան մասնագիտական օտար լեզվի միասնական քննություններ:

Մանրամասները՝ տեսանյութում։

Աննա Բաբաջանյան