Վախենամ` թեման առնչվում է շատ բարձրաստիճան պաշտոնյաների. Փաշինյանը՝ Խծաբերդում գերեվարումների մասին. ՏԵՍԱՆՅՈՒԹ

Ինչու՞ Հադրութի երկու գյուղերի՝ Խծաբերդի և Հին Թաղերի հետվերադարձի հարցն առ այսօր որևէ կերպ օրակարգային հարց չի դառնում։ ԱԺ-ում ՀՀ վարչապետ Նիկոլ Փաշինյանին այս հարցն ուղղեց «Պատիվ ունեմ» խմբակցության պատգամավոր Տիգրան Աբրահամյանը՝ հավելելով, որ այդ երկու գյուղերը նոյեմբերի 9-ի դրությամբ գտնվում էին հայկական վերահսկողության ներքո։

«Մոտ մեկ տարի առաջ ադրբեջանական զորքերը բռնազավթեցին Հադրութի շրջանի երկու գյուղերը, որի հետևանքով մոտ մեկ տասնյակ զոհ ունեցանք և 62 անձ գերեվարվեց»,-նշեց պատգամավորը։

ՀՀ վարչապետ Նիկոլ Փաշինյանը նկատեց՝ Հին Թաղերում 9 զինվոր մինչև վերջ կանգնել են և իրենց կյանքը տվել են հանուն հայրենիքի։

«Ինչ վերաբերում է ձեր նշած դրվագին, դրա հետ կապված քրեական գործ կա հարուցված։ Փաստն այն է, որ գործով անցնող առանցքային մեղադրյալներից մեկին այդպես էլ չի հաջողվել կալանավորել, որովհետև դատարանները մերժել են կալանավորելու միջնորդությունը»,- նշեց վարչապետը:

Նա նաև հավելեց, որ այս թեման պարունակում է պետական շահերին առնչվող և գաղտնիք պարունակող տեղեկություններ, որոնք լրացուցիչ քննության առարկա պետք է դառնան:

Տիգրան Աբրահամյանը հետաքրքրվեց՝ կառավարությունն ընդունու՞մ է, որ ադրբեջանական քայլերը տեղի են ունեցել նոյեմբերի 9-ի եռակողմ հայտարարությունից դուրս։

Նիկոլ Փաշինյանն արձագանքեց, որ եթե համարեին, որ Խծաբերդի և Հին Թաղերի բռնազավթումը նոյեմբերի 9-ի հայտարարությանը համապատասխանում է, ապա իր նշած հերոս նահատակներն այդ դիրքերում կանգնած չէին լինի։

«Եթե այդ դիրքերում կանգնած են եղել, նշանակում է՝ մենք համարում ենք, որ այդ իրադրությունը չի համապատասխանել նոյեմբերի 9-ի հայտարարության դրույթներին և տրամաբանությանը։ Շատ հարցեր կան, որ կուզենայի բարձրաձայնել, բայց բազմաթիվ պատճառներով այս ամբիոնից չեմ կարող բարձրաձայնել։ Ամենևին խնդիր չկա հնարավորինս իջեցնել թեման, որովհետև վախենամ այդ թեման առնչվում է շատ բարձրաստիճան պաշտոնյաների, որոնց գործողությունները կոծկելու ցանկություն չունեմ»,- ասաց Նիկոլ Փաշինյանը։

Մանրամասները՝ տեսանյութում: