ԵՄ-ն պատրաստ է իր աջակցությունը ցուցաբերել հետկոնֆլիկտային վերականգնման միջոցառումներին․ Շառլ Միշել

ԵՄ-ն պատրաստ է իր դերակատարությունն ունենալ հակամարտությունների կարգավորման և կանխման հարցում: Դա ներառում է վստահության ամրապնդումն ու աջակցումը համապարփակ ու կայուն կարգավորմանը, այդ թվում՝ հետհակամարտային վերականգնմանն ուղղված միջոցառումների հարցում: Այս մասին հայտարարել է Եվրոպական խորհրդի նախագահ Շառլ Միշելը՝  ելույթ ունենալով Արևելյան գործընկերության քաղաքացիական հասարակության ֆորումին։

«Հարևանները միշտ կարևոր են: Եթե մենք ցանկանում ենք խաղաղություն, կայունություն և բարգավաճում, պետք է աշխատենք մեր հարևանների հետ։ Պատմությունը մեզ սովորեցրել է այս դասը: Եվ մեր Արևելյան գործընկերությունը այս պարզ ճշմարտության վկայությունն է ավելի քան 12 տարի: Մենք զարգացրել ենք մեր գործընկերությունը՝ չնայած մարտահրավերներին՝ սկսած տնտեսական ճգնաժամերից մինչև զինված հակամարտություններ և COVID-ի համաճարակ։ Եվ կարևոր առաջընթաց է գրանցվել՝ բարելավելով ընտրական շրջանակները, բարեփոխելով վարչակազմերը, խթանելով դատական իշխանության անկախությունը և կոռուպցիայի դեմ քրեական հետապնդում:
Բայց մենք բոլորս գիտենք, որ մարտահրավերներ դեռ կան: Դրանց դեմ պայքարելիս մենք պինդ ենք և համառ: Ժողովրդավարության ամրապնդումը, կոռուպցիայի դեմ պայքարը, օրենքի գերակայության պաշտպանությունը, ազատ մամուլը երաշխավորելը և ապատեղեկատվության դեմ պայքարը դժվարին պայքար է, բայց էական և արժանի պայքար:

Տարածաշրջանում երկարատև հակամարտությունները մնում են հիմնարար մարտահրավեր: Դրանք պահանջում են նոր ջանքեր՝ միջազգային իրավունքի սկզբունքներին և նորմերին համապատասխան: ԵՄ-ն պատրաստ է խաղալ իր դերը՝ օգնելու կանխել և լուծել հակամարտությունները: Սա ներառում է վստահության ձևավորում և նպաստում տևական և համապարփակ կարգավորումներին՝ ներառյալ աջակցություն հետկոնֆլիկտային վերականգնման միջոցառումներին:

Հայաստանի և Ադրբեջանի հարաբերությունները ցույց են տալիս իրավիճակի փխրունությունը. Ես լիովին համոզված եմ, որ միայն քաղաքական երկխոսությունը կարող է հանգեցնել կայուն կարգավորման։ Դա պահանջում է նաև Հայաստանում և Ադրբեջանում քաղաքացիական հասարակության համախմբում, կամուրջներ կառուցելու և հաշտեցմանն ուղղված ջանքերի աջակցում»,-ասված է Շառլ Միշելի հայտարարության մեջ։

Տաթև Ֆռանգյան