22.08.2026 | 21:13
Դիլիջան-Վանաձոր ճանապարհին ավտոմեքենան դուրս է եկել երթևեկելի հատվածից և բախվել հողաթմբին
Լեհ սահմանապահներն ու զինվորականները հետ են մղել Բելառուսի կողմից սահմանը ուժով հատելու միգրանտների փորձը
Քաղաքականություն
30.11.2021 | 18:47
Լեհ սահմանապահներն ու զինվորականները հետ են մղել միգրանտների կողմից լեհ-բելառուսական սահմանը բռնի ուժով հատելու փորձը։ Այս մասին երեքշաբթի հայտնել են երկրի սահմանապահ ծառայությունից։
«Այսօր ժամը 02:30-ի սահմաններում մի խումբ ագրեսիվ օտարերկրացիներ փորձել են բռնի ուժով Բելառուսից հատել Լեհաստանի սահմանը Շուդզյալովոյի սահմանապահ ստորաբաժանման կողմից պահպանվող տարածքում՝ քարեր, մետաղական խողովակներ և ճայթրուկներ նետելով լեհական բանակի սահմանապահ սպաների և զինվորների ուղղությամբ։ Փորձը կանխվել է»,- ասվում է Լեհաստանի սահմանապահ ծառայության Twitter-յան էջում տեղադրված հաղորդագրության մեջ։
Սահմանապահ ծառայության տվյալներով՝ վերջին 24 ժամվա ընթացքում լեհ-բելառուսական սահմանն ապօրինի հատելու 134 փորձ է ճնշվել։ Ուկրաինայի երկու քաղաքացիներ են ձերբակալվել հանցակցության համար։ Շուդզյալովից բացի՝ սահմանը բռնի հատելու փորձեր են գրանցվել նաև Մելնիկում։
Իրավիճակը լեհ-բելառուսական սահմանին կտրուկ սրվել է նոյեմբերի 8-ին, երբ մի քանի հազար միգրանտներ մոտեցել են սահմանին։ Պարբերաբար մեծ խմբերով նրանք փորձում են ճեղքել պատնեշները և մտնել Լեհաստանի տարածք։ Այդ փորձերի մեծ մասը ձախողվում է լեհական ծառայությունների կողմից։ Ընթացիկ տարում լեհ սահմանապահները կանխել են լեհ-բելառուսական սահմանն ապօրինի հատելու գրեթե 40 հազար փորձ, ինչը 400 անգամ ավելի է, քան անցյալ տարի։
Տաթև Ֆռանգյան
