14.01.2026 | 13:36
Նախկինում մեզ մերժում էին և հրաժարվում էին սպառազինություն վաճառել․ Փաշինյան․ ՏԵՍԱՆՅՈՒԹ
Զենք-զինամթերքը, զինտեխնիկան թեթևացրել են, պոստերից դուրս գալն էլ ընթացքի մեջ է. Սիսիանի ղեկավարը` Իշխանասարից ադրբեջանական զինուժի հեռանալու մասին
Քաղաքականություն
30.11.2021 | 12:56
Իշխանասարի տարածքից ադրբեջանական զինուժն ամբողջությամբ հետ չի քաշվել, սակայն գործընթաց կա․ այս մասին Factor.am-ի հետ զրույցում ասաց Սիսիան համայնքի ղեկավարի պաշտոնակատար Արմեն Հակոբջանյանը՝ անդրադառնալով Իշխանասար բնակավայրի տարածքից ադրբեջանական զինուժի հետ քաշման տեղեկություններին։ «Զենք֊զինամթերքը, զինտեխնիկան թեթևացրել են, պոստերից դուրս գալն էլ ընթացքի մեջ է։ Այս պահին սա է իմ տեղեկությունները։ Երեկվանից են թեթևացել»,-ասաց նա։
Ադրբեջանական զորքերի՝ Իշխանասարի հատվածից հետ քաշվելու մասին այսօր Factor.am-ի հետ զրույցում հայտնել էր Իշխանասար գյուղի վարչական ղեկավար Մարատ Պետրոսյանը։ Վարչական ղեկավարի խոսքով՝ ադրբեջանական զինուժի ներկայացուցիչները հետ են քաշվել մինչև այն տարածք, որտեղով մինչ այդ անցնում էր Խորհրդային Ադրբեջանի սահմանը։
Հայաստանի Հանրապետության պաշտպանության նախարարությունը այս տեղեկությունները ոչ հաստատել են, ոչ հերքել են։ «Արմենպրես»-ի հարցմանն ի պատասխան՝ Պաշտպանության նախարարությունից միայն հորդորել են սահմանային իրադրության, զինված ուժերի տեղաշարժի, զբաղեցրած բնագծերի կամ այլ գործողությունների մասին տեղեկությունները տարածել ոչ թե հիմնվելով համայնքների ղեկավարների խոսքի, այլ ՊՆ պաշտոնական հաղորդագրությունների վրա։ Նշենք, որ քիչ առաջ ԱԺ֊ում Պաշտպանության նախարարի տեղակալ Արման Սարգսյանը հրաժարվել էր այս թեմայի վերաբերյալ որևէ հարցի պատասխանել։
Նարեկ Կիրակոսյան
