Քաղաքականություն
29.11.2021 | 17:41
Չեխիայի նախագահ Միլոշ Զեմանը կիրակի Պետր Ֆիալային պաշտոնապես նշանակել է երկրի նոր վարչապետ։ Երկրի նախագահը դա արել է՝ նստած ապակե խորանարդի մեջ, բուժաշխատողների ուղեկցությամբ, որոնք ոտքից գլուխ ծածկված են եղել պաշտպանիչ համազգեստով, գրում է CNN-ը:
Ավելի վաղ Չեխիայի նախագահ Զեմանի կորոնավիրուսի թեստը դրական է եղել, նա ներկայումս բուժում է ստանում մայրաքաղաք Պրահայի արևմուտքում՝ Լանիում գտնվող նախագահական նստավայրում, COVID-ի հետ կապ չունեցող լուրջ հիվանդության պատճառով հիվանդանոցում երկար մնալուց հետո:
Ֆիալան, ինչպես և արարողության մյուս մասնակիցները պաշտոնական փաստաթուղթը ստորագրելիս դիմակով են եղել, իսկ Զեմանը նստած է եղել հատուկ այդ կապակցությամբ տեղադրված ապակե խորանարդի մեջ:
Աջ կենտրոնամետ ODS կուսակցության նախագահ Ֆիալան կգլխավորի երկու կենտրոնամետ կոալիցիաներից կազմված հինգ կուսակցություններից բաղկացած խմբավորումը, որը հաղթել է անցյալ ամիս անցկացված խորհրդարանական ընտրություններում: Արդյունքների հրապարակումից անմիջապես հետո երկու կոալիցիաները հուշագիր ստորագրեցին կառավարություն ձևավորելու մասին՝ գործող վարչապետ Անդրեյ Բաբիշին պաշտոնանկ անելու համար:
Տաթև Ֆռանգյան
