Ղրղզստանում ընտրությունների նախնական արդյունքներով՝ առաջատար են իշխանամետ կուսակցությունները

Ղրղզստանի խորհրդարանական ընտրություններում, քվեաթերթիկների ավելի քան 97 տոկոսի հաշվարկից հետո, առաջատար է իշխանամետ «Հանրապետություն-Աթա Ջուրթ» կուսակցությունը․ այն հավաքել է ձայների 16,4 տոկոսը։ Դրան 13,2 տոկոս ձայներով հաջորդում են նաև իշխանամետ «Իշենիմ» (Վստահություն) և 10,7 տոկոս ձայնով՝ «Յընտըմակ» (Համաձայնություն) կուսակցությունները, գրում է DW-ի ռուսական ծառայությունը։

Ձայների 97 տոկոսի հաշվարկից հետո ընդդիմադիր «Դաշինք» կուսակցությունը հավաքել է ձայների 8,07%-ը։ Մեկ այլ ընդդիմադիր՝ «Բուտուն Ղրղզստան» (Միասնական Ղրղզստան) կուսակցության օգտին քվեարկել է ընտրողների 6,6%-ը։
Վերջին կուսակցությունը, որին այս պահին հաջողվում է հաղթահարել 5 տոկոսի շեմը և մտնել խորհրդարան, «Յիման Նուրուն» է (Խղճի լույս)․ այս կուսակցության օգտին քվեարկել է ընտրողների 5,95%-ը։

Հավելենք, որ Ղրղզստանի նախագահ Սադիր Ջապարովն արդեն կոչ է արել ճանաչել ընտրությունների արդյունքները։ Քաղաքական գործչի ընդդիմադիրները, սակայն, նրան մեղադրում են ընտրությունների նախաշեմին իր բոլոր հակառակորդներին կալանավորելու մեջ։

Այսպես՝ ընտրությունների նախօրեին Ղրղզստանի հատուկ ծառայությունները հայտարարեցին 15 մարդու, այդ թվում՝ պատգամավորների և նախկին բարձրաստիճան պաշտոնյաների ձերբակալության մասին, որոնք, իբր, դավադրություն էին նախապատրաստում՝ իշխանությունը տապալելու համար։ Ձերբակալվածների անունները, սակայն, չեն նշվում։

Տաթև Ֆռանգյան