29.06.2026 | 14:25
ՀՀ ֆինանսների նախարարն ու ԿԲ նախագահը միջազգային ներդրողներին ներկայացրել են Հայաստանի մակրոտնտեսական զարգացումները
Մեր ապագան էր, իրենով էինք ապրում. ԱԹՍ-ի հարվածից զոհված Սիփան Սողոմոնյանը կդառնար 20 տարեկան․ ՏԵՍԱՆՅՈՒԹ
Հասարակություն
26.11.2021 | 23:13
44-օրյա պատերազմում զոհված Սիփան Սողոմոնյանն այսօր կդառնար 20 տարեկան։ Արդեն երկրորդ անգամ առանց նրա են ծննդյան օրը նշում․ ընտանիքի անդամներն ու հարազատները հիշատակի ցերեկույթ էին կազմակերպել։ Տան բակում, որտեղ անցել են Սիփանի մանկությունն ու պատանեկությունը, նրա անունով հուշաքար բացվեց։
Սիփանն ընդամենը 9 ամսվա զինծառայող էր, երբ սկսվեց Արցախյան երկրորդ պատերազմը․ ծնողներն իրենց որդուն վերջին անգամ տեսել են երդմնակալության արարողության օրը՝ Մատաղիսում։ Պատերազմին կրտսեր սերժանտը Թալիշում էր կռիվ մղում: Սիփանի մայրը, որ որդու նկարով շապիկ է կրում, ասում է՝ խոստումը, որ Սիփանը տվել էր երդմնակալության օրը, կատարեց․ կյանքը չխնայեց հանուն հայրենիքի։ Սիփանը զոհվել է պատերազմի 2-րդ օրը՝ սեպտեմբերի 28-ին, ԱԹՍ-ի հարվածից։
Որ իրենց որդին էլ չկա՝ ծնողներն իմացել են սեպտեմբերի 30-ին հեռուստատեսությամբ, զոհված տղաների անուններն հնչեցնելիս։
«Սիփանը շատ լուրջ տղա էր, էությամբ անթերի էր, 18 տարեկան էր, բայց կարծես 30 տարեկան լիներ»,- ասում է Սիփանի մայրը՝ Կարինե Մարյանյանը։
Սպորտսմեն էր Սիփանը, ըմբշամարտով էր զբաղվում, Հայաստանում ու Վրաստանում տարբեր մրցույթների էր մասնակցել՝ զբաղեցնելով առաջին և երկրորդ տեղերը: Զորացրվելուց հետո էլ մտադիր էր շարունակել զբաղվել սպորտով։
«Մեր ապրած յուրաքանչյուր օրն ու վայրկյանը իր մասին է հիշեցնում, մենք ապրում էինք իրենով, մեր ապագան էր, որը էլ չունենք։ Երազում էր, որ մեր ընտանիքը ամուր լինի, ու որ միշտ ժպտանք․ հանուն իրեն պետք է միշտ ժպտանք»,- ընդգծում է Սիփանի մայրը։
Տիկին Կարինեն, որ կշարունակի ժպտալ հանուն որդու, ամեն անգամ նրա հետ խոսելու համար Եռաբլուր է գնում, գրկում որդու սառը շիրիմը։ Ասում է՝ Սիփանի կիսատ թողած երազանքներն իրենք են ավարտին հասցնելու։
Մանրամասները՝ տեսանյութում։
Արփի Հակոբյան
